Qus tumaýy virýsy adamzat úshin COVID-19-dan da qaýipti jańa pandemiiaǵa sebep bolýy múmkin. Bul týraly Frantsiiadaǵy Paster institýtynyń Tynys joldarynyń infektsiialary ortalyǵynyń direktory Mari-Ann Rameiks-Velti Reuters agenttigine málimdedi, dep habarlaidy Dalanews.kz.
«Jabaiy qustar, úi qustary jáne sútqorektiler arasynda taralyp jatqan qus tumaýy virýsy mýtatsiiaǵa ushyrap, adamnan adamǵa juǵa alatyn qabiletke ie bolsa, COVID-19-dan da aýyr pandemiia bolýy múmkin», – dep atap ótti ol.
Mamannyń aitýynsha, adamdarda maýsymdyq H1 jáne H3 tumaýyna qarsy antideneler bar, alaida H5 qus tumaýyna qarsy qorǵanys joq. COVID-19 pandemiiasynyń basynda da osyndai jaǵdai bolǵan, biraq aiyrmashylyq – koronavirýs kezinde negizinen halyqtyń álsiz toptary qatty zardap shekti.
Al tumaý virýstary deni saý adamdardy, onyń ishinde balalardy da óltirýi múmkin. Rameiks-Veltidiń pikirinshe, qus tumaýy pandemiiasy COVID-19-dan da aýyr bolýy yqtimal.
Agenttiktiń málimetinshe, buǵan deiin adamdardyń H5 qus tumaýy, sonyń ishinde H5N1 virýsyn juqtyrý jaǵdailary kóp tirkelgen. Alaida kóbine bul juqpa virýs taraǵan janýarlarmen jaqyn bailanys kezinde bolǵan. Osy aida AQSh-tyń Vashington shtatynda H5N5 virýsyn adamǵa juqtyrýdyń alǵashqy jaǵdaiy anyqtaldy: er adamdy aman alyp qalý múmkin bolmaǵan.
Rameiks-Veltidiń aitýynsha, álem bul qaýipke koronavirýs kezindegiden jaqsyraq daiyndalǵan. Sonymen qatar, Dúniejúzilik janýarlar densaýlyǵy uiymynyń ǵylymi bóliminiń basshysy Gregorio Torres adamdar arasynda ǵalamdyq pandemiia qaýpi tómen deńgeide qalyp otyrǵanyn aitty. Onyń sózinshe, ázirge alańdaýǵa sebep joq, adamdar tabiǵatta emin-erkin júrip, taýyq etin jáne jumyrtqa tutyna alady.
