قۇس تۇماۋى ۆيرۋسى ادامزات ءۇشىن COVID-19-دان دا ءقاۋىپتى جاڭا پاندەمياعا سەبەپ بولۋى مۇمكىن. بۇل تۋرالى فرانسياداعى پاستەر ينستيتۋتىنىڭ تىنىس جولدارىنىڭ ينفەكسيالارى ورتالىعىنىڭ ديرەكتورى ماري-انن رامەيكس-ۆەلتي Reuters اگەنتتىگىنە مالىمدەدى، دەپ حابارلايدى Dalanews.kz.
«جابايى قۇستار، ءۇي قۇستارى جانە سۇتقورەكتىلەر اراسىندا تارالىپ جاتقان قۇس تۇماۋى ۆيرۋسى مۋتاسياعا ۇشىراپ، ادامنان ادامعا جۇعا الاتىن قابىلەتكە يە بولسا، COVID-19-دان دا اۋىر پاندەميا بولۋى مۇمكىن»، – دەپ اتاپ ءوتتى ول.
ماماننىڭ ايتۋىنشا، ادامداردا ماۋسىمدىق H1 جانە H3 تۇماۋىنا قارسى انتيدەنەلەر بار، الايدا H5 قۇس تۇماۋىنا قارسى قورعانىس جوق. COVID-19 پاندەمياسىنىڭ باسىندا دا وسىنداي جاعداي بولعان، ءبىراق ايىرماشىلىق – كوروناۆيرۋس كەزىندە نەگىزىنەن حالىقتىڭ ءالسىز توپتارى قاتتى زارداپ شەكتى.
ال تۇماۋ ۆيرۋستارى دەنى ساۋ ادامداردى، ونىڭ ىشىندە بالالاردى دا ءولتىرۋى مۇمكىن. رامەيكس-ۆەلتيدىڭ پىكىرىنشە، قۇس تۇماۋى پاندەمياسى COVID-19-دان دا اۋىر بولۋى ىقتيمال.
اگەنتتىكتىڭ مالىمەتىنشە، بۇعان دەيىن ادامداردىڭ H5 قۇس تۇماۋى، سونىڭ ىشىندە H5N1 ۆيرۋسىن جۇقتىرۋ جاعدايلارى كوپ تىركەلگەن. الايدا كوبىنە بۇل جۇقپا ۆيرۋس تاراعان جانۋارلارمەن جاقىن بايلانىس كەزىندە بولعان. وسى ايدا اقش-تىڭ ۆاشينگتون شتاتىندا H5N5 ۆيرۋسىن ادامعا جۇقتىرۋدىڭ العاشقى جاعدايى انىقتالدى: ەر ادامدى امان الىپ قالۋ مۇمكىن بولماعان.
رامەيكس-ۆەلتيدىڭ ايتۋىنشا، الەم بۇل قاۋىپكە كوروناۆيرۋس كەزىندەگىدەن جاقسىراق دايىندالعان. سونىمەن قاتار، دۇنيەجۇزىلىك جانۋارلار دەنساۋلىعى ۇيىمىنىڭ عىلىمي ءبولىمىنىڭ باسشىسى گرەگوريو توررەس ادامدار اراسىندا عالامدىق پاندەميا ءقاۋپى تومەن دەڭگەيدە قالىپ وتىرعانىن ايتتى. ونىڭ سوزىنشە، ازىرگە الاڭداۋعا سەبەپ جوق، ادامدار تابيعاتتا ەمىن-ەركىن ءجۇرىپ، تاۋىق ەتىن جانە جۇمىرتقا تۇتىنا الادى.
