Құс тұмауы вирусы адамзат үшін COVID-19-дан да қауіпті жаңа пандемияға себеп болуы мүмкін. Бұл туралы Франциядағы Пастер институтының Тыныс жолдарының инфекциялары орталығының директоры Мари-Анн Рамейкс-Вельти Reuters агенттігіне мәлімдеді, деп хабарлайды Dalanews.kz.
«Жабайы құстар, үй құстары және сүтқоректілер арасында таралып жатқан құс тұмауы вирусы мутацияға ұшырап, адамнан адамға жұға алатын қабілетке ие болса, COVID-19-дан да ауыр пандемия болуы мүмкін», – деп атап өтті ол.
Маманның айтуынша, адамдарда маусымдық H1 және H3 тұмауына қарсы антиденелер бар, алайда H5 құс тұмауына қарсы қорғаныс жоқ. COVID-19 пандемиясының басында да осындай жағдай болған, бірақ айырмашылық – коронавирус кезінде негізінен халықтың әлсіз топтары қатты зардап шекті.
Ал тұмау вирустары дені сау адамдарды, оның ішінде балаларды да өлтіруі мүмкін. Рамейкс-Вельтидің пікірінше, құс тұмауы пандемиясы COVID-19-дан да ауыр болуы ықтимал.
Агенттіктің мәліметінше, бұған дейін адамдардың H5 құс тұмауы, соның ішінде H5N1 вирусын жұқтыру жағдайлары көп тіркелген. Алайда көбіне бұл жұқпа вирус тараған жануарлармен жақын байланыс кезінде болған. Осы айда АҚШ-тың Вашингтон штатында H5N5 вирусын адамға жұқтырудың алғашқы жағдайы анықталды: ер адамды аман алып қалу мүмкін болмаған.
Рамейкс-Вельтидің айтуынша, әлем бұл қауіпке коронавирус кезіндегіден жақсырақ дайындалған. Сонымен қатар, Дүниежүзілік жануарлар денсаулығы ұйымының ғылыми бөлімінің басшысы Грегорио Торрес адамдар арасында ғаламдық пандемия қаупі төмен деңгейде қалып отырғанын айтты. Оның сөзінше, әзірге алаңдауға себеп жоқ, адамдар табиғатта емін-еркін жүріп, тауық етін және жұмыртқа тұтына алады.
