Qazaqstan 2027 jyly ótetin 99-shy "Oskar syilyǵyna rejisser Elzat Eskendirdiń "Ábil" dramasyn usyndy. Qazaqstannyń Oskar komiteti tańdaǵan týyndy "Úzdik halyqaralyq tolyqmetrajdy film" sanaty boiynsha el atynan baq synaidy, dep habarlaidy dalanews.kz.
Kartinanyń ózeginde toqsanynshy jyldardyń basyndaǵy qazaq aýyly qamtylǵan. Keńestik júie ydyrap, el naryqtyq qatynastarǵa bet burǵan tusta burynǵy kolhozdardyń da tirshiligi ózgerdi. Film osy alasapyran kezeńdi iri saiasi oqiǵalar arqyly emes, qarapaiym shopannyń ómiri arqyly kórsetedi.
Ábil uzaq jyl boiy kolhozdyń malyn baǵyp, eńbek etken. Alaida sharýashylyq tarap, onyń dúnie-múlki jekeshelendirile bastaǵanda, keiipker óz eńbegine sai tiesili úlesin alýǵa árekettenedi. Osy tartys arqyly rejisser jańa zamanǵa beiimdelýge májbúr bolǵan aýyl adamdarynyń jaǵdaiyn, ádilet pen adamdyq qadir máselesin alǵa shyǵarady. Filmdegi oqiǵa 1993 jyly órbidi.
Týyndynyń qarjylyq jaǵy da nazar aýdararlyq. Rejisser buǵan deiin filmniń jalpy biýdjeti 320 mln teńge bolǵanyn aitqan. Kartina memlekettik qoldaýmen túsirilgen. Alaida túsirilim kezinde qarajat tapshylyǵy týyndap, Elzat Eskendir óz qalamaqysyn film óndirisine qaita salǵan. Prodiýser Serik Ábishev te jobany aiaqtaý úshin jeke qarajatyn jumsaǵan.
"Ábil" Qazaqstan atynan "Oskarǵa" usynylǵanǵa deiin halyqaralyq kino alańdarynda kórsetilip úlgerdi. Onyń álemdik premerasy Pýsan halyqaralyq kinofestivalinde ótti. Keiin film Frantsiia, Qyrǵyzstan, Vetnam jáne Bangladeshtegi festivalderden júlde aldy. Basty keiipkerdi somdaǵan Erlan Tóleýtaidyń akterlik jumysy da birneshe halyqaralyq baiqaýda marapattaldy.
Qazaqstandyq kórermenge film biyl jazda jol tartty. "Ábil" 25 maýsymnan bastap otandyq kinoteatrlarda kórsetildi.
