Ótken aptadan beri Sara Nazarbaeva týraly aqparattar aityla bastady. Dalanews.kz Sara Nazarbaeva týraly derekterge sholý jasap shyqty.
Sara Nazarbaevanyń densaýlyǵy týraly ne belgili?
Sara Nazarbaeva aýyr hálde jatqany belgili boldy. Qazaqstannyń tuńǵysh prezidentiniń otbasyna jaqyn derekkózge súiensek, dárigerler Sara Alpysqyzyna kómektese almai otyr.
Orda portalynyń málimetinshe, Qazaqstannyń burynǵy prezidenti Nursultan Nazarbaevtyń jubaiy Sara Alpysqyzy qazir Almatydaǵy aýrýhanalardyń birinde em qabyldap jatyr. Aýrýhana ǵimaratynyń syrtyna kúzet qoiylǵan. Ishke erkin kirip-shyǵýǵa nemese túsirilim jasaýǵa tyiym salynǵan. Aýrýhanaǵa emdelýge kelgen keibir azamattar Sara Alpysqyzyn ishki bólimshelerde kórgenin rastaǵan.
Osy jaǵdaiǵa bailanysty basylym QR Prezidenti Is basqarmasyna qarasty meditsinalyq ortalyqtyń baspasóz hatshysy Elena Koemetske habarlasqan. Degenmen naqty málimet ala almaǵan.
Derekkózder Sara Alpysqyzynyń densaýlyǵyndaǵy másele jasyna bailanysty bolýy múmkin ekenin aitady. Biraq naqty diagnozy jariialanbady.
Sara Nazarbaevamen jaqyn aralasqan azamattardyń biri, Qazaqstandaǵy balalar úileri túlekteri qaýymdastyǵynyń prezidenti Rafael Gasanov qazir Sara Nazarbaevanyń janynda jaqyn adamdary men týystary baryn rastady.
"Sara Alpysqyzy bizge jaqyn jan. Ol bizdi jaqsy tanidy. Biz de onyń tezirek saýyǵyp ketýin tilep otyrmyz", – degen Rafael Gasanov basylymǵa.
Gasanovtyń aitýynsha, ol - Sara Nazarbaeva negizin qalaǵan SOS balalar aýyldarynyń túlegi.
"Sara apai jii kelip turatyn. Syilyq ákeletin, ómir týraly, adami qundylyqtar jaiynda aitatyn. Biz ony "anamyz" deitinbiz. Ol sheneýnikterdiń ózi syilaityn tulǵa bolatyn", – dedi ol.
Onyń aitýynsha, Sara Alpysqyzy burynǵy tárbielenýshilerimen áli kúnge deiin bailanysyn úzbegen. Jaqynda ǵana Rafael Gasanovqa kitaptar syilap, qoǵamdyq jumysyna sáttilik tilegen.
Sara Nazarbaeva týraly ne belgili?
Sara Alpysqyzy Nazarbaeva (qazirgi tegi – Qonaqaeva) - Qazaqstannyń tuńǵysh prezidenti Nursultan Nazarbaevtyń jubaiy, qoǵam qairatkeri. Ol 1941 jyly Qaraǵandy oblysynda dúniege kelgen. Joǵary bilim alyp, injener-metallýrg mamandyǵy boiynsha eńbek etken.
1962 jyly Nursultan Nazarbaevpen otaý qurǵan. Erli-zaiyptynyń úsh qyzy bar: Dariǵa, Dinara jáne Áliia.
Sara Alpysqyzy biraz ýaqyttan beri qoǵamdyq ómirge sirek aralasyp, saiasi sahnadan tys qaldy. Ol kópshilik aldynda jii kórinbei ketti.
1992 jyly ol "Bóbek" halyqaralyq balalar qaiyrymdylyq qoryn qurdy. Bul qordyń maqsaty – jetim, múmkindigi shekteýli jáne áleýmettik turǵyda osal toptaǵy balalarǵa jan-jaqty kómek kórsetý. Sonymen qatar, onyń bastamasymen elimizdegi mektepterde "Ózin-ózi taný" páni engizildi. Keiin bul pán oqý baǵdarlamasynan alyp tastaldy. Sara Alpysqyzynyń bastamasymen Qazaqstanda "SOS – balalar aýyldary" halyqaralyq jobasy iske asty.
Keiingi jyldary ol burynǵy tegin ózgertip, qyz kezindegi tegi Qonaqaevany qaita alǵany belgili boldy.
Oǵan qosa biraz jyldan beri Saranyń ózine qaraǵanda qyzdary jii jurt nazarynda. Tipti byltyr Sara Nazarbaeva qaitys bolǵany týraly aqparat tarady. Keiinirek tuńǵysh prezident Nursultan Nazarbaevtyń keńesshisi ári baspasóz hatshysy Aidos Úkibai bul aqparat shyndyqqa janaspaitynyn málimdedi.
"Saǵymdy syndyrmady". Nazarbaev keiingi jyldary Sara týraly ne aitty?
2023 jyly Nursultan Nazarbaev "Meniń ómirim. Bodandyqtan - bostandyqqa" atty kitap shyǵaryp, osy kitabynda uldary, olardyń anasy týraly "aǵynan jaryldy". Sóz arasynda Sara Alpysqyzyn qosýdy da umytpaǵan.
Kitapta ekinshi áieli Ásel Isabaevamen qalai tanysqany, bul jańalyqty onyń birinshi áieli Sara Alpysqyzy qalai qabyldaǵany týraly jazylǵan.
"Teginde, adam balasyna eń basty baqytty, eń baiandy baqytty bala ǵana, perzent qana bere alatyn bolsa kerek. Úsh perzentimdi, úkilegen úsh qyzymdy - Dariǵany, Dinarany, Áliiany dúniege ákelgen, jas shaǵymnan janyma jalaý bolǵan, nebir syn saǵatta qasymnan tabylǵan Saraǵa bar ǵumyrymda rizamyn jáne qamqorshymyn. Sol qily kezeńde de meni túsingenin, keshirgenin myna ómirdegi bir jubanyshym kóremin. Taýman týǵanda Almatyǵa, aldyna baryp, bar jaidy aqtaryp, aiybymdy aitqanymda tektiligin taǵy da tanytyp edi aitýly áýlettiń perzenti", - dep jazǵan ol.
Onyń sózinshe, Sara Alpysqyzynyń atasy da ekinshi áiel alǵan.
"Bala - perishte. Bala baqytty bolyp óssin" dedi sonda Sara. Qyzdarym da meni durys uqty. Sara Alpysqyzynyń qai áiel úshin de qiyn synaqta tanytqan keńdiginiń bir sebebin ishtei sezetin de siiaqtymyn. Atasy Arqadaǵy ataqty Qonaqai bai ekenin jazdym ǵoi. Sol kiside ul bolmapty. Aqyry alpystan asqan jasynda báibishesi ózi aittyryp, jas qyzǵa úilendirgen eken. Oilaǵanyndai ul týyp, atyn Alpys qoiypty. Kim biledi, babadan tamyr tartqan sol dástúr esine túsip, bolǵan iske keńshilik kórsetti me eken?
Áiteýir onsyz da qinalǵan janymdy qajai bergen joq, saǵymdy syndyrmady. Men ózim balany ul dep, qyz dep bóletinderden emespin. Úsh qyzymdy da janymdai jaqsy kóremin. Olardan týǵan nemerelerdi de jien dep jatpaimyn. Ul bala - shańyraqty ustaityn ie, áýlet jalǵastyrar kie... Mine, solai, aǵaiyn. Jan syrymdy jaiyp saldym aldyńyzǵa. Qalai deseńiz de, ózińiz bilesiz. Bul - ómir. Bir anyq nárse bar. Júrekke ámir júrmeidi", - dep jazylǵan kitapta.
"Eshkimmen aralaspaidy"
Ulttyq qaýipsizdik komitetiniń eks tóraǵasy, general-leitenant Amangeldi Shabdarbaev Sara Nazarbaevamen aralasqanyn, onyń qandai adam ekenin aitty.
"Sara Alpysqyzy týraly kóp eshkim aitpaidy. Ol kisi kóp sóilemeitin, biraq tik aitatyn. Tipti kúieýine de "halyqtyń qamyn oilamaisyń ba?" dep aitatyn. Áielderi (Nazarbaevtyń - esk.) paida bolǵan kezde ekeýiniń arasy qatty sýyp ketti. Sara Alpysqyzy týraly aitýdyń qajeti de joq, ol kisi - jai qarapaiym adam. Esh jerde sóilep, lektsiia jasamaǵan adam. Sara Alpysqyzy Nursultan Nazarbaevtyń saiasi sheshimderine aralaspady. Aralasqannyń ózinde Nazarbaev ol kisimen sanaspaityn. Ol kisi tiri. Ne qudalarymen de, ne basqalarymen de aralaspaidy", – dedi Amangeldi Shabdarbaev TALK LIKE YouTube arnasyna bergen bir jyl burynǵy suhbatynda.
Onyń sózinshe, qazir Sara Nazarbaevanyń aralasatyn jaqyn tanys, dostary da joq.
"Ózi sondai adam dep aitýǵa da bolar edi. Qazir ózimen-ózi. Tike minezi bolǵan. Meni unatpady. 8 naýryzǵa gúl jiberemin ǵoi. Meniń gúlimdi laqtyryp tastatqyzady. Sara Alpysqyzy meni keiin jek kórip ketti. Nursultan Nazarbaev Rahat Álievke qatty sendi, biliktiń bári sonyń qolynda boldy. Ol kóp nárse jasady. ...Men birinshi baryp Rahatqa tiistim ǵoi. ...Dariǵa ekeýi Sara Alpysqyzyn maǵan qarsy qoidy", – dedi ol suhbatynda.
Buǵan deiin Sara Nazarbaeva týraly qandai aqparat tarady?
Biraz ýaqyttan beri esimi BAQ-ta atalmai qalǵanymen, byltyr eks-prezident Nursultan Nazarbaevtyń birinshi áieli Sara Nazarbaeva negizin qalaǵan institýt memleket menshigine ótti degen aqparat tarady.
Úkimet qaýlysynda Sara Nazarbaeva negizin qalaǵan institýt memleket menshigine ótkeni jariialandy.
Bul institýt keiingi jyldary jumys baǵytyn ózgertip, rebrending jasaǵan edi. "Adamnyń úilesimdi damýy ulttyq institýty" endi "Órken" balalar salamaty ulttyq ǵylymi-tájiribelik institýty" dep jariialandy.
"Bul institýt 2021 jyly Sara Nazarbaeva negizin qalaǵan "Bóbek" qorynyń janynan ashylǵan edi. Institýttyń negizgi missiiasy "Ózin-ózi taný" rýhani-adamgershilik bilim berý baǵdarlamasy arqyly eldiń adami áleýetin damytýǵa úles qosý boldy. Al Qazaqstanda "Ózin-ózi taný" rýhani-adamgershilik bilim berý baǵdarlamasy 2022 jyly zań júzinde óz jumysyn toqtatty", - dep jazylǵan habarlamada.
