Qańtar oqıǵasy boıynsha qylmystyq isterdi tergeý kezinde QR burynǵy Qorǵanys mınıstri Murat Bektanov jaýapty sátte óziniń qyzmettik mindetin oryndamaǵany anyqtaldy.
19.02.2022 jyly osy fakti boıynsha Bas prokýratýra QK-niń 452-shi baby (bılik ókiliniń áreketsizdigi) boıynsha sotqa deıingi tergeý bastaldy.
Aıta ketelik, Bektanov qańtar aıynda Qorǵanys mınıstri qyzmetinen tústi. Prezıdent Toqaev qorǵanys salasyna jaýapty mamannyń el basyna kún týǵan shaqta komandırlik qabiletin kórsete almaǵanyn aıtyp, synǵa alǵan edi.
"Mınıstr Bektanov qıyn sátte qaýqarsyzdyq tanytty. Komandalyq-shtabtyq jáne áskerı oqý-jattyǵýlar barysynda jaqsy nátıje kórsetken armıaǵa ıe bola otyryp, biz qıyn jaǵdaıda onyń áleýetin paıdalana almadyq jáne syrttan kómekke júginýge májbúr boldyq",- dedi Memleket basshysy.
