قاڭتار وقيعاسى بويىنشا قىلمىستىق ىستەردى تەرگەۋ كەزىندە ق ر بۇرىنعى قورعانىس ءمينيسترى مۇرات بەكتانوۆ جاۋاپتى ساتتە ءوزىنىڭ قىزمەتتىك مىندەتىن ورىنداماعانى انىقتالدى.
19.02.2022 جىلى وسى فاكتى بويىنشا باس پروكۋراتۋرا قك-نىڭ 452ء-شى بابى (بيلىك وكىلىنىڭ ارەكەتسىزدىگى) بويىنشا سوتقا دەيىنگى تەرگەۋ باستالدى.
ايتا كەتەلىك، بەكتانوۆ قاڭتار ايىندا قورعانىس ءمينيسترى قىزمەتىنەن ءتۇستى. پرەزيدەنت توقايەۆ قورعانىس سالاسىنا جاۋاپتى ماماننىڭ ەل باسىنا كۇن تۋعان شاقتا كومانديرلىك قابىلەتىن كورسەتە الماعانىن ايتىپ، سىنعا العان ەدى.
"مينيستر بەكتانوۆ قيىن ساتتە قاۋقارسىزدىق تانىتتى. كوماندالىق-شتابتىق جانە اسكەري وقۋ-جاتتىعۋلار بارىسىندا جاقسى ناتيجە كورسەتكەن ارمياعا يە بولا وتىرىپ، ءبىز قيىن جاعدايدا ونىڭ الەۋەتىن پايدالانا المادىق جانە سىرتتان كومەككە جۇگىنۋگە ءماجبۇر بولدىق"،- دەدى مەملەكەت باسشىسى.
