Kolýmbiianyń batysynda qýatty jer silkinisi bolyp, eldiń birneshe qalasynda tótenshe jaǵdai qalyptasty. Magnitýdasy 7,4 baldyq zilzala saldarynan keminde eki adam qaza taýyp, ondaǵan ǵimarat zaqymdanǵan. Úiindi astynda qalǵan adamdar bolýy múmkin, dep habarlaidy dalanews.kz.
Zilzala dúisenbi kúni jergilikti ýaqyt boiynsha tańǵy 7:34-te tirkelgen. Jer silkinisiniń oshaǵy Kolýmbiianyń batysyndaǵy Choko departamentindegi San-Hose-del-Palmar mýnitsipalitetiniń mańynda ornalasqan. Oshaq shamamen 79 shaqyrym tereńdikte bolǵan.
Eń qatty zardap shekken óńirlerdiń qatarynda Choko, Risaralda, Kaldas jáne Vale-del-Kaýka departamentteri bar. Kalide keminde 19-20 ǵimarattyń zaqymdanǵany nemese qulaǵany habarlandy. Keibir adamdardyń úiindi astynda qalǵany týraly aqparat túsken.
Manisaleste ǵimarattardyń biri qirap, eki adam kóz jumǵan. Al Choko departamentiniń astanasy Kibdoda jaralanǵandar bar. Qalada birqatar nysanǵa aitarlyqtai zaqym kelgen.
Jer dúmpýi kórshi elderge de jetti
Qýatty zilzala Kolýmbiiamen ǵana shektelmedi. Jer silkinisi Ekvador, Panama jáne Venesýelada da sezilgen. Bogotada turǵyndar ǵimarattardan syrtqa shyǵyp, qaýipsiz jerge jinalǵan.
Negizgi dúmpýden keiin sol aimaqta 4,8 baldyq qaitalama jer silkinisi tirkeldi. Qutqarý qyzmetteri zardap shekken aýdandardy tekserip, qiraǵan nysandardyń astynda adamdardyń bar-joǵyn anyqtap jatyr. (Tico Times)
Áýejailardyń qaýipsizdigine bailanysty Pereira, Manisales jáne Armeniia qalalaryndaǵy áýe qatynasy ýaqytsha toqtatylyp, nysandar tekserile bastaǵan.
Kolýmbiia biligi qutqarý jumystaryn kúsheitti. Eldiń tótenshe jaǵdai qyzmetteriniń málimetinshe, zilzala toǵyz departamentke jáne barlyq 32 departament astanasyna áser etken.
Qazir qutqarýshylar úiindilerdi arshyp, zardap shekkenderge kómek kórsetip jatyr. Mamandar keiingi dúmpýler bolýy múmkin ekenin eskertip otyr.
Qaza bolǵandar men zardap shekkenderdiń naqty sany qutqarý jumystary aiaqtalǵannan keiin ǵana belgili bolýy múmkin.
