Almatyda №80 baǵyttaǵy avtobýs jol apatyna ushyrap, tórt adam zardap shekti. Olardyń arasynda júkti áiel men onyń eki balasy bar, dep habarlaidy dalanews.kz.
Jol apaty Bókeihanov kóshesi men Raiymbek dańǵylynyń qiylysynda bolǵan. Oqiǵa kezinde avtobýsta bolǵan jolaýshy Angelina Stepanovanyń aitýynsha, ol ulymen birge salonnyń aldyńǵy bóliginde otyrǵan.
«Búgin ulymmen birge Bókeihanov – Raiymbek kóshelerinde jol apatyna tústik. Kimniń kóbirek kináli ekenin bilmeimin. Avtobýs burylysqa syimai qalǵan siiaqty. Biz aldyńǵy bóliginde otyrdyq. Bizge basqalarǵa qaraǵanda kóbirek joly boldy. Synǵan áinek salonnyń ishine ushyp kirdi. Zardap shekkender kóp emes: júkti áiel, onyń eki kishkentai balasy jáne kóshede bolǵan er adam. Ol qulap qaldy, avtobýs ony basyp kete jazdady», – dedi jolaýshy.
Politsiia jol-kólik oqiǵasy bolǵanyn rastady.
«Aldyn ala málimet boiynsha, Golden Dragon markaly avtobýs Bókeihanov kóshesimen soltústik baǵytta kele jatyp, Raiymbek dańǵylyna jaqyndaǵan kezde júrgizýshi rýlge ie bola almai, jol jieginde turǵan ZIL júk kóligimen soqtyǵysqan. Soqqydan ZIL inertsiiamen aldynda turǵan GAZ kóligine soǵylǵan», – dep habarlady politsiia.
Qazir jol apatynyń sebepteri men barlyq mán-jaiy anyqtalyp jatyr.
