Smartfondar balalar men jasóspirimderdiń kúndelikti ómiriniń bir bóligine ainaldy. Alaida gadjetti shamadan tys paidalaný olardyń minez-qulqyna, oqýyna, uiqysyna jáne ainalasyndaǵy adamdarmen qarym-qatynasyna áser etýi múmkin, dep habarlaidy dalanews.kz.
Mamandar bul másele ásirese jasóspirimder arasynda jii kezdesetinin aitady.
The Conversation basylymynyń málimetinshe, jasóspirimderdiń miy áli tolyq qalyptasyp bitpeidi. Ásirese, ózin-ózi baqylaýǵa, josparlaýǵa jáne óz áreketiniń saldaryn baǵalaýǵa jaýap beretin mi bólikteri damý kezeńinde bolady.
Sondyqtan jasóspirimder áleýmettik jelidegi laik, pikir, habarlama men basqa da jyldam keri bailanystarǵa eresekterge qaraǵanda kóbirek mán berýi múmkin.
Balanyń gadjetke táýeldi ekenin qalai baiqaýǵa bolady?
Mamandar birneshe belgige nazar aýdarýǵa keńes beredi. Sonyń ishinde telefonǵa kelgen habarlamalardy únemi tekserý, bos ýaqytyn gadjetsiz ótkize almaý jáne jaqyndarymen betpe-bet sóilesýge qyzyǵýshylyqtyń azaiýy bar.
Sonymen qatar bala sabaq pen basqa da mańyzdy isterdi keiinge qaldyryp, telefonǵa kóbirek ýaqyt bóle bastasa, bul da alańdatatyn belgi bolýy múmkin.
Túnde smartfondy uzaq paidalaný uiqy rejimine de áser etedi. Sonyń saldarynan bala kúndiz sharshańqy júrýi yqtimal.
Smartfonǵa táýeldilik qalai qalyptasady?
Ǵalymdardyń aitýynsha, munda kútpegen marapat alý mehanizmi mańyzdy ról atqarady. Jańa habarlama, laik nemese eskertý kelgen saiyn adam qysqa ýaqytqa jaǵymdy emotsiia sezinýi múmkin.
Malim.kz basylymynyń jazýynsha, ýaqyt óte kele mi osyndai reaktsiiaǵa úirenip, telefondy jii tekserý ádetke ainalady. Keide smartfon jai ǵana kóz aldynda turǵannyń ózinde ony qolǵa alyp, ekranyn tekserýge degen qulshynys paida bolýy múmkin.
Ata-analar ne istei alady?
Mamandar eń aldymen ata-analardyń óz gadjet qoldaný ádetine nazar aýdarý kerektigin aitady.
Otbasy músheleri birge otyrǵan kezde telefondy múmkindiginshe shetke qoiý, smartfondardy únemi qoljetimdi jerde ustamaý jáne gadjet qoldanýǵa qatysty ortaq ereje belgileý paidaly bolýy múmkin.
Mundai talap tek balaǵa ǵana emes, búkil otbasyǵa ortaq bolǵany durys.
Sarapshylardyń pikirinshe, ata-ananyń jeke úlgisi men úidegi túsinikti erejeler balanyń gadjetke shamadan tys áýestenýiniń aldyn alýǵa kómektesedi.
