25 qyrkúiek kúni tańerteń Qazaqstannyń keibir óńirlerinde elektr qýaty ýaqytsha óshti. Buǵan kórshi Ózbekstannyń energiia júiesinde bolǵan aqaý sebep bolǵan, dep habarlaidy dalanews.kz.
KEGOC kompaniiasynyń málimetinshe, tańǵy saǵat 05:02 shamasynda Ózbekstandaǵy elektr stantsiialarynyń birinde 1516 megavatt qýat óndirý toqtap qalǵan. Sonyń saldarynan Ortalyq Aziia elderiniń ortaq energiia júiesindegi elektr aǵyny kúrt ózgergen.
Osy jaǵdai Qazaqstannyń soltústigi men ońtústigin jalǵaityn negizgi elektr jelisiniń jumysyna áser etip, el ishinde tutynýshylarǵa beriletin elektr qýatyna ýaqytsha shekteý engizilgen. Shekteý kólemi 962 megavatt bolǵan.
Kompaniia apattyń aldyn alýǵa arnalǵan avtomatty qorǵanys júieleri qalypty rejimde jumys istep, energiia júiesiniń turaqtylyǵyn saqtap qalǵanyn habarlady.
KEGOC dereginshe, saǵat 05:43-te Qazaqstannyń ońtústik óńirlerindegi energiia júiesiniń jumysy tolyq qalpyna keltirilip, tutynýshylarǵa qoiylǵan barlyq shekteý alynyp tastalǵan.
