Qazaqstanda 25 tamyzdan bastap júrgizýshilerge qatysty jańa talaptar qoldanysqa engiziledi. Ózgeris 65 jastan asqan azamattarǵa, múgedektigi bar júrgizýshilerge jáne mas kúide kólik júrgizýge bailanysty qylmystyq isi belgili bir negizdermen toqtatylǵan adamdarǵa qatysty bolady, dep habarlaidy dalanews.kz.
Jańa tártipke sáikes, 65 jastan asqan jáne múgedektigi bar azamattar belgilengen merzimde meditsinalyq tekserýden ótýge tiis. Olardyń kólik basqarýǵa jaramdy ekeni týraly dárigerlik qorytyndy jol qozǵalysy salasyndaǵy tsifrlyq júiede tirkelýi qajet.
Eger aqparattyq júiede júrgizýshiniń densaýlyq jaǵdaiyna qatysty qorytyndy bolmasa, onyń kólik júrgizý quqyǵy ýaqytsha toqtatylýy yqtimal. Quqyq meditsinalyq málimetter júiege engizilgennen keiin qaita qalpyna keltiriledi.
Jańa talaptar mas kúiinde kólik basqarýǵa qatysty qylmystyq isi aiyptaý úkiminsiz toqtatylǵan azamattardy da qamtidy. Mundai jaǵdaida júrgizýshi kýáligin saqtaý múmkin bolmaidy.
Kólik basqarý quqyǵyn toqtatý týraly sheshim zańdy kúshine engen qaýly negizinde qabyldanady. Ol úshin sottyń qosymsha sheshimi qajet emes.
Mas kúiinde kólik júrgizýge bailanysty quqyǵynan aiyrylǵan azamat kólik tizginine segiz jyldan keiin ǵana qaita otyra alady. Ol meditsinalyq tekserýden ótip, jol qozǵalysy erejeleri boiynsha teoriialyq emtihan tapsyrýǵa mindetti.
Osylaisha, jańa tártip júrgizýshilerdiń densaýlyq jaǵdaiyn baqylaýdy kúsheitip, mas kúiinde kólik basqarǵan azamattarǵa qoiylatyn talaptardy qatańdatady.
