Aýdandaǵy Mádeniet kúni ótken Balpyq bi aýylyndaǵy mádeniet úiiniń aldy ulttyq reńke toly kóshpeli kórmege ainaldy. Arnaiy tigilgen 6 kiiz úidiń árqaisysynyń mazmundyq bezendirilýi biyl mereitoilyq jyly bolǵan Qabylisa jyraý, aqyn Sara, Temirbek Júrgenov, Muqan Tólebaev, Kemel Toqaev, Biken Rimovaǵa arnaldy. Al 7-shi kiiz úide qoiylǵan kórmede Kóksý aýdanynyń damý tarihy men aýdan halqynyń jetistikteri pash etildi.
Aýdan ákimi Marlen Kólbaevtyń aitýynsha, bul sharany uiymdastyrýdaǵy maqsaty - aýdan turǵyndaryna elimizdiń ár qiyrynan jetkizilgen tarihi jádigerlerdi kórsetý.
– Jeti – qazaq halqy úshin erekshe máni bar kieli san. Sondyqtan búgin alańǵa óz aýdanymyzda jasalǵan 7 kiiz úi tiktik. Kórmege Almatydaǵy, oblysymyzdyń aimaqtaryndaǵy túrli mýzeilerdiń jádigerleri, sonymen qatar otbasylyq muraǵattardaǵy jeke buiymdar da ákelindi. Olardyń barlyǵy qazaq halqynyń mádenietin tanytatyn, turmysyn kórsetetin zattar, – dedi Marlen Kólbaev.
Sondai-aq ol Kóksý aýdanynda ótken 8 aida aýdan ortalyǵyn ǵana emes, 10 aýyldyq okrýgti de qamtyǵan 340 mádeni shara ótkizilgenin atap ótti. Sonyń ishinde mýltfilm, kórkem film kórsetý, sol siiaqty jastardy eljandylyqqa tárbieleý, ulttyq qundylyqtarymyzdy dáripteý, salamatty ómir saltyn nasihattaý baǵytyndaǵy buqaralyq is-sharalar da bar.
Aýdan turǵyndary men qonaqtary kóshpeli mýzei kórmelerimen tanysyp, qolóner sheberleriniń týyndylaryn tamashalady. Mektep oqýshylary ózderi salǵan sýretterin, jasaǵan qysh-qumyra buiymdaryn kórsetse, aǵa býyn kilem toqý, teri ileý, kiiz basý, quraq quraý, kórpe tigý siiaqty qolóner túrlerin pash etti. Sol siiaqty aýdan aýmaǵynda turatyn basqa ult ókilderi de ulttyq kórmelerin uiymdastyrdy.
Aýyl sharýashylyǵymen ainalysatyn sharýalar da ózderi ósirip, óndirgen ekologiialyq taza azyq-túlikterin kópshiliktiń nazaryna usyndy. Aýdanda kartop, piiaz ben sarymsaq, qyryqqabat, qyzanaq pen qiiar, kókónistiń basqa da túrleri, jemis-jidekter ósiriledi. Kórmede asyl tuqymdy mal sharýashylyqtarynyń jetistikteri de kórsetildi. Sonyń ishinde appaq narlar kelýshilerdiń nazaryn erekshe aýdardy.
Aýdan kásipkerleri de kórmeden tys qalǵan joq. Olar da óz ónimderin tanystyrdy. Bul rette keramzit kirpish, trotýar plitkalarynyń birneshe túri, qurylys torlary kópshiliktiń nazaryna usynyldy, sol siiaqty kelýshiler sýarý matorlaryn, kiiz úilerdi, motobloktardy qurastyratyn kásiporyndardyń da ónimderimen tanysty.
Kóksý aýdanynyń Mádeniet kúni sharasynyń qorytyndysynda jergilikti óner ujymdarynyń kontserttik baǵdarlamasy qoiyldy.
– Mádeniet – árdaiym qoldap otyrýdy qajet etetin sala. Bul sala eń aldymen halyqtyń salt-dástúrin saqtaýǵa, rýhani qýatyn arttyrýǵa, mádeni muralaryn baiyta túsýge, jastarǵa patriottyq tárbie berýge yqpal etedi. Bul rette oblys basshylyǵynyń qoldaýymen ótken jyldan beri nysandardyń materialdyq-tehnikalyq bazasyn nyǵaitý jumystary júrgizilip keledi. Sońǵy úsh jylda 7 mádeniet úiine aǵymdaǵy jóndeý, 1 mádeniet úiine kúrdeli jóndeý jasaldy. Sol siiaqty Jarlyózek aýylyndaǵy mádeniet úii qurylysynyń JSQ-sy ázirlenýde. Kelesi jyly qurylys jumysyn bastaimyz. Biylǵy jyly aýdanda 2 jańa mektep pen 2 FAP paidalanýǵa berildi. Respýblika kúnine qarai blokty modýldi konstrýktsiialardan turǵyzylǵan 4 medpýnktti, 2 órt sóndirý pýnktin, salynyp jatqan 6 balalar alańynyń 2-eýin ashamyz dep josparlap otyrmyz, – dedi josparlary týraly oi bólisken Marlen Kólbaev.
Merekelik sharada kelýshiler tegin sirne, palaý, ystyq baýyrsaqtan dám tatty.
Eske salsaq, oblysta aýdan, qalalardyń «Jer jánnaty – Jetisý» atty mádeniet kúnderi qyrkúiek aiynan bastalǵan bolatyn. Merekelik shara búginge deiin Aqsý, Panfilov, Kóksý aýdandarynda ótti. Mádeniet kúnderi 30 qyrkúiekte Taldyqorǵandaǵy Qala kúni merekesimen túiindeledi. Al aýdan, qalalardyń mádeniet kúnderine bastan-aiaq qatysyp, qazylyq etken mádeniet qairatkerleri, oblystyq mádeniet, arhivter jáne qujattama basqarmasynyń qyzmetkerleri jeńimpazdardy anyqtap, júldegerlerdi marapattaý sharasy qarasha aiynda Taldyqorǵanda ótedi.
