Kókshetaý qalasynda injenerlik jeliler men abattandyrý nysandaryn salýǵa bólingen biýdjet qarajatyn jymqyrý faktisi boiynsha tergeý júrgizilip jatyr, dep habarlaidy Dalanews.kz.
2020 jyly «Kókshetaý qalasynyń qurylys bólimi» MM men merdiger uiymdar - «TAU PROJEKT» JShS jáne «SEM-StroiEnergoMontaj» JShS arasynda bekitilgen jobalyq-smetalyq qujattama aiasynda qurylys-montaj jumystaryn oryndaý jáne tehnikalyq qadaǵalaý jóninde kelisimsharttar jasalǵan.
Alaida merdiger kompaniialardyń benefitsiary oryndalǵan jumys kólemin ádeii arttyrý shemasyn uiymdastyrǵan.
Qabyldaý aktilerine is júzinde oryndalmaǵan nemese tolyq oryndalmaǵan jumystar týraly jalǵan málimetter engizilgen.
Sonyń saldarynan qujat júzinde rastalǵanymen, sý burý júiesiniń negizin daiyndaý, aryq bloktaryn ornatý, káriz-sorǵy stantsiiasyn jetkizý jáne montajdaý jumystary naqty oryndalmaǵan.
Óz kezeginde Qurylys bóliminiń basshysy naqty oryndalǵan jumys kólemi jobalyq sheshimderge sáikes kelmeitinin bile tura, jalǵan aktilerge qol qoiýdy qamtamasyz etip, qarjylandyrýdy toqtatý jáne sharttardy buzý sharalaryn qabyldamaǵan.
Qol qoiylǵan qujattar negizinde merdiger uiymdarǵa biýdjet qarajaty aýdarylyp, keiin olardy zańdastyrý maqsatynda qarajat «MAZHERUS» JShS jáne «Tamila Invest» JShS arqyly qaita bólingen.
Memleketke keltirilgen zalal 160 mln teńgeden asty. Sot sanktsiiasymen kúdiktilerdiń múlkine, onyń ishinde 10 avtokólikke, 3 jer ýchaskesine jáne bir páterge tyiym salyndy.
Kúdiktilerge qatysty qamaýǵa alý jáne úiqamaq túrindegi bultartpaý sharalary qoldanyldy. Tergeý jalǵasýda.
