«AMANAT» partiiasynyń Hatshysy Jiger Qalievtiń aitýynsha, oryn alyp otyrǵan jaǵdai memlekettiń pedagogtardy qoldaý úshin jumsaǵan bar kúsh-jigerin zaia ketiredi.
– Májilis depýtattary men partiianyń aimaqtardaǵy qoǵamdyq qabyldaý bólmelerine mektep muǵalimderinen eńbek demalysynyń aqysy men saýyqtyrý járdemaqysynyń tolyq jáne ýaqtyly tólenbeý faktileri boiynsha kóptegen shaǵym kelip tústi. Partiia músheleriniń 30%-dan astamy – bilim berý salasynyń ókilderi. Sondyqtan búgin biz partiia alańyna ókiletti ministrlikterdiń ókilderin shaqyrdyq jáne beinekonferentsia bailanysy arqyly barlyq óńir qosylyp otyr, – dedi Jiger Qaliev.
Óz kezeginde Keńes tóraǵasynyń orynbasary, «AMANAT» partiiasynan sailanǵan Májilis depýtaty Juldyz Súleimenova bilim salasyn damytyp, ustazdardyń mártebesin kóterýdi partiia óziniń sailaýaldy baǵdarlamasynda belgilep, qoldap kele jatqanyn alǵa tartty.
– Pandemiiadan keiingi oqý jyly ustazdarymyz úshin de ońai bolǵan joq. Osyndai kezde muǵalimderge qatysty mundai jaǵdaidyń oryn alǵany jónsiz. Keńeske qai mekteptiń, qai muǵalimi tólem almaǵany týraly málimet berilýi tiis. Al 30 maýsymǵa deiin barlyq qarajat tólenýi qajet, – dedi depýtat.
– Qazirgi tańda óńirler tólemderdiń 92,5%-ǵa júzege asyrylǵanyn habarlady. Jaqyn arada barlyq muǵalimder tiisti qarajatty alady, – dep sendirdi vitse-ministr.
Alaida jergilikti atqarýshy organdardyń ókilderi tólemder qarajatty ishki qaita bólý esebinen júrgiziletinin jáne jyl sońynda kópshiligi biýdjet tapshylyǵyna tap bolatynyn alǵa tartty.
Májilis depýtaty, «AMANAT» fraktsiiasynyń múshesi Iýliia Kýchinskaia máseleniń túp-tamyryna úńilip, ony júieli túrde sheshý kerek dep esepteidi.
– Búgin óńirlerdi osy olqylyqtyń ornyn toltyryp, máseleni tez arada sheshý úshin taǵy da qajetti qarajatty tabýǵa májbúrledi. Biraq sol aimaqtardyń ózderinen bul aqshany qaidan alǵanyn suraiyqshy. Erteń taǵy da jergilikti atqarýshy organdar kináli bolyp shyǵady jáne osy tetikterdiń barlyǵy bir problemadan ekinshisine ulasady. Bul jerde Oqý-aǵartý ministrligi jaqsy bolyp qalǵysy keletinin túsinemin. Biraq bul jergilikti atqarýshy organdardyń jumysyn durys atqarmaǵanynan oryn aldy deý durys emes. Ministrliktiń jiberilgen qatelikter men oryn alǵan máseleni moiyndaǵysy kelmeýi únemi biýdjet qarajatynyń tapshylyǵyna alyp keldi, – dep tolyqtyrdy halyq qalaýlysy.
