Osymen eki apta boiy Almaty qalasynyń ákimine jasalǵan aqparattyq qysym tolastar emes, óitkeni.
Shabýyldy "Karavan" gazeti bastap berdi. «Kók-jasyl qalanyń siqyrshysy: Baibek Almatyda ne búldirdi?» degen maqalany osy kúnge deiin 100 myńnan asa adam oqyǵan eken. Biz de oqydyq.
Ákimniń jumysyn ashyq synaǵan basylymnyń jazýynsha, qalaǵa basshy bolǵaly ýaqytta Baibek túk bitirmegen.
"Qar tazalanbaǵan, aryq arshylmaǵan, jol jóndelmegen, qoǵamdyq kóliktiń siqy anaý, taý etegindegi úiler tasqynnyń astynda qaldy. Mektepterde oqýshylar syǵylysyp oqýǵa májbúr. Bir ǵana "Ońai" júiesin alaiyq. Qoǵamdyq kólikti tártipke keltirem degenine eki jyldyń júzi boldy. Ýádesin oryndady ma? Joq. Jańadan ákelem degen 300 avtobýs qaida? Eshkim bilmeidi. Esesine óz-ózine jarnama jasaýǵa qumar. Kóptiń aldyna shyqqanda unatady. Sheshen sóileidi. Sózi men isi sai emes, biraq. Ol bastamashy bolǵan kez-kelgen jańa joba qirap, qulap tynady" delingen maqalada.
Maqala avtory Baibektiń Ýniversiadany óz deńgeiinde ótkizbegenin de synǵa alǵan.
"Karavan" derekkóziniń málimetinshe, Almaty qalasyndaǵy aýys-túiis jaqyn kúnderi oryn alady. Baibektiń ózi qandai qyzmetke taǵaiyndalatyny ázirshe belgisiz.
Bylaiynsha, maqala orystildi basylymdardyń stilinde jazylypty. Baibekke tiisken sebepterdiń kópshiligi tyrnaq astynan kir izdegenge kóbirek uqsai ma, qalai?..
Bizdiń esimizde qalǵany, Baibek Almatyǵa ákim bola sala aldymen Qonaevqa Quran baǵyshtaǵan.
Almatyda 24 jyl boiyna el bolyp qoidyra almai kele jatqan Saiasi-qýǵyn súrgin men asharshylyq qurbandaryna arnap eskertkish ashatynyn aitty. Bilsek, eskertkish daiyn. Aldaǵy ýaqytta ashylýy tiis.
Ultshyldarmen tilge keldi. Birshama dialog qurdy. Birqatar kóshe ataýlaryn yń-shyńsyz aýystyrdy. Bala-baqshanyń aqshasyn arzandatty. Táýelsizdiktiń 25 jyldyǵyn da óz deńgeiinde atap ótti. Ázirge, esimizge túskeni osy ǵana. Másele, ony maqtaýda emes.
Másele, Baibekke shabýyl jasaýǵa kim pármen berdi? Ony ornynan ketirýge kim múddeli? Oǵan jasalǵan aqparattyq qysymnyń astarynda ne jatyr?
Dýman BYQAI
