Májilis depýtaty Baqytjan Bazarbekke qarsy “iskerlik bedeldi qorǵaý” týraly azamattyq talap-aryz sotta qaraldy. Sot sheshimi depýtattyń MÁMS júiesindegi zańbuzýshylyqtarǵa qatysty aitqan málimdemeleri naqty faktilerge negizdelgenin kórsetti. Bul týraly depýtat Murat Ábenov áleýmettik jelidegi paraqshasynda jazdy, dep habarlaidy Dalanews.kz.
Meditsinalyq mekeme “Salaýatty Astana” JShS Bazarbekti iskerlik bedelge nuqsan keltirdi dep aiyptaǵan. Alaida saraptama qorytyndylary men sot sheshimi bul ýájderdi negizsiz dep tanyǵan.
“Bul sheshim – ádilettiń jeńisi dep esepteimin. Basynda-aq bul daýdyń bedel týraly emes ekeni belgili boldy”, — dedi Murat Ábenov.
Onyń aitýynsha, qoǵam áldeqashan bul uiymdardyń júzdegen million teńge kólemindegi qarajatty zańsyz iemdenip, azamattardyń em-domyna bólingen qarjyny maqsatsyz paidalanǵanynan habardar bolǵan.
“Jarty jyl buryn Memlekettik aýdit joǵary palatasy resmi túrde bul zańbuzýshylyqtardy jariialap, meditsinalyq mekemelerdiń basshylyǵy sol aktilerge óz qolymen qol qoiyp, júzdegen million teńgege qatysty zańbuzýshylyqty moiyndaǵan. Qyzmet kórsetilmei turyp qarajat alǵandaryn dáleldeitin derekter úshin aiyppul da tóledi. Iaǵni, Baqytjan Bazarbek bul jaidy ashyp aitpas buryn-aq olar kinálaryn janama túrde moiyndap qoiǵan”, — dep qosty ol.
Aitýynsha, Bazarbektiń Májiliste bul faktilerdi ashyq ataǵany keibireýlerge unamai, oǵan qysym kórsetý, úrkitý, isti ári qarai qazbalaýdan bas tartqyzý áreketteri bastalǵan.
“Alaida meniń áriptesim Baqytjan Bazarbek ádilet jolynda taisalmai, ashyq kúresýden qoryqpaityn adam. Buǵan deiin de ol Joǵarǵy sot tóraǵasyn synǵa alyp, quqyqtary taptalǵan adamdardy qorǵady. Úsh jyl buryn úlken laýazymdy tulǵalar qurylys kompaniiasyn qoldap shyqqan kezde de, Bazarbek sheginbedi. Sońynda onyń aitqany shyn bolyp shyqty”, — dep qosty ol.
Depýtat Baqytjan Bazarbek te bul jaǵdaiǵa qatysty pikir bildirip, máseleniń tek jeke basyna baǵyttalǵan emes, júielik sipattaǵy másele ekenin atap ótti.
“27 qańtarda Úkimet saǵatynda men Mindetti áleýmettik meditsinalyq saqtandyrý (MÁMS) júiesindegi qarjylyq zańbuzýshylyqtar týraly Joǵarǵy aýditorlyq palatanyń qorytyndysynan naqty derekter keltirdim.
Sol kúni-aq aty atalǵan meditsinalyq mekemeler tarapynan shaǵymdar túse bastady”, — deidi ol.
Bazarbektiń sózinshe, "Salaýatty Astana" JShS sotqa júginse, "Shipager" JShS sotqa deiingi shaǵym joldaǵan.
“2025 jylǵy mamyrda Astana qalasynyń aýdanaralyq azamattyq soty isti toqtatyp, saraptamaǵa jiberdi.
2025 jylǵy 2 maýsymda Almatydaǵy saraptama ortalyǵynyń filologiialyq jáne quqyqtyq qorytyndysy shyqty. Sarapshylar meniń sózderimnen iskerlik bedelge nuqsan keltiretin jaǵymsyz tujyrymdar tappady.
12 maýsymda sot “Salaýatty Astana” JShS-niń aryzyn qanaǵattandyrýdan bas tartty!
Bul iste tereń úńilýge, meditsinalyq uiymdardyń MÁMS aiasynda alǵan qarajattary men qujattaryn zertteýge múmkindik týdy. Júiedegi kemshilikterdi kórip shoshydym”, — deidi ol.
Zańnamalyq túzetýler men baqylaý quzyreti
Bazarbektiń aitýynsha, bul oqiǵa tek bir sheshimmen shektelmei, naqty ózgeristerge bastaý bolǵan. Ol áriptesteri Murat Ábenov jáne Irina Smirnovamen birge MÁMS júiesin jetildirý boiynsha zań jobasyn daiyndap, Densaýlyq saqtaý ministrligine baqylaý fýnktsiialaryn qaitarýdy usynǵan. Májilis bul túzetýlerdi eki oqylymda maquldaǵan.
“Endi ministrlik litsenziiasyz qyzmet etetin uiymdardy anyqtap, olardyń jumysyn toqtata alady”, – dedi Bazarbek.
Depýtat sot protsesinde ózin qorǵaǵan zańgerlerge de alǵys aitty.
“Osy kúreste meniń qorǵaýshylarym — elimizge belgili advokattar Murat Ámitov, Murat Mýtaliev, Bahtiiar Ǵalymjanov, Mádi Qoshyqbaev erekshe eńbek etti. Biz kúnde kezdesip, saǵattap strategiia oilastyrdyq. Advokattardyń kásibi ári tiianaqty jumysy – jalǵan aiyptaýlarǵa berilmeitin eń myqty jaýap.”, — dep qosty ol.
Sondai-aq ol Advokattar alqasynyń tóraǵasy Aidyn Bikebaevqa jáne qoldaý bildirgen jýrnalisterge – Botagóz Omarova, Mihail Kozachkov, Sandýǵash Dúisenovaǵa alǵysyn jetkizdi.
“Al aryzdanýshylarǵa aitarym – Bazarbekpen sottasqansha, naýqastardy emdeýmen ainalysqan durys”, — dep sózin túiindedi ol.
Eske salaiyq, buǵan deiin Densaýlyq saqtaý salasyndaǵy bylyqty ashqan depýtatqa qysym kórsetilip jatqany týraly jazǵan edik. Bul týraly jýrnalist ári qoǵam belsendisi Botakóz Omarova málimdedi.
Onyń aitýynsha, bul jaǵdai — tek Bazarbekke emes, eldegi ádildik izdegen kez kelgen belsendi azamatqa jasalǵan qysym.
“Jýrnalist, qoǵam belsendisi nemese halyq qalaýlysy milliardtaǵan aqshanyń qaida ketip jatqanyn zerttep, ashyq aitsa — birden qysymǵa ushyraidy, kiberbýllingke tap bolady, artynan sotqa súireleidi. Bul — óte alańdatatyn signal”, – deidi Omarova.
Máseleniń máni nede?
Jýrnalistiń aitýynsha, 2024 jyldyń qańtar aiynda Baqytjan Bazarbek Densaýlyq saqtaý salasyndaǵy zańbuzýshylyqtardy anyq kórsetken ótkir depýtattyq saýal joldap, onda úsh basty máselege nazar aýdarǵan.
“Birinshi másele — biýdjet qarajatyn jymqyrý. Meditsinalyq mekemeler tiisti qyzmetke litsenziiasyz-aq milliardtaǵan teńge alyp otyrǵan. Bul – memlekettik qarajatty zańsyz iemdený degen sóz. Áńgime 9 milliard teńge týraly bolyp otyr.
Ekinshi másele — litsenziialardyń bolmaýy. “Salaýatty Astana” JShS jáne “Shipager” JShS meditsinalyq qyzmetterdi, sonyń ishinde akýsherlik qyzmetti de litsenziiasyz kórsetken. Bul — densaýlyq saqtaý týraly zańdy tikelei buzý. Eger naýqastardyń densaýlyǵy men ómirine ziian kelgen jaǵdailar anyqtalsa, másele tipti qylmystyq jaýapkershilikke deiin jetedi.
Úshinshi másele — baqylaýshy organdardyń áreketsizdigi. Joǵary aýditorlyq palata men Bas prokýratýra bul máseleni formaldy túrde ǵana atap ótken, biraq shyndyqty ashyp aitpaǵan. Is júzinde, máseleni jabýly kúide qaldyrǵan”, — deidi ol.
Omarovanyń sózinshe, depýtattyń dál osy saýalynda aitqan “Aýshvits”, “Birkenaý”, “Býhenvald” sózderi — daý-damaidyń ózegine ainalǵan.
“Bul tarihi ataýlar aryzdanýshylar tarapynan "iskerlik bedelimizge nuqsan keltirdi" dep baǵalanǵan. Al millirdtaǵan qarajattyń zańsyz jumsalýy jaily málimetterge qatysty eshqandai shaǵym túsirilmegen.
Eń qyzyǵy, depýtat keltirgen derekter – Joǵary aýditorlyq palatanyń óz aqparaty. Biraq Álihan Smaiylovty kim sotqa bere alady? Ol burynǵy premer, Prezident Toqaevtyń jaqyn ainalasyndaǵy tulǵa. Sondyqtan Bazarbekti qysymǵa alý áldeqaida ońai bolyp tur”, — deidi ol.
Jýrnalist Botakóz Omarova bul oqiǵaǵa bailanysty kelesi naqty suraqtardy qoidy.
• Litsenziiasyz qyzmet kórsetken JShS jáne sol zańbuzýshylyqqa jol bergen tulǵalarǵa qatysty qylmystyq is qozǵaldy ma?
• Litsenziiasyz mekemelerge qarjy qalai aýdarylyp kelgen? Ol qujattarǵa kim qol qoidy?
• Biýdjet aqshasy qaitarylyp jatyr ma?
• Densaýlyq saqtaý ministrligi, MÁMS qory, Astana qalasynyń densaýlyq saqtaý basqarmasynan bireý jaýapqa tartyldy ma?
• Bul aqshany tiimsiz paidalaný ma, álde 9 milliard teńgeni ashyq túrde jymqyrý ma?
Osy suraqtarǵa jaýapty Antikor basshysy Ashat Jumaǵali, Bas prokýror Berik Asylov jáne Qarjylyq monitoring agenttiginiń tóraǵasy Janat Elimanov berýi tiis dep esepteidi avtor.
Sondai-aq ol Májilis tóraǵasy men áriptesterin Bazarbekke baǵyttalǵan sottyq qysymǵa tosqaýyl qoiýǵa shaqyrady.
“Erlan Jaqanuly!
Búginde Májilis – halyqtyń ádildikke degen úmitin arqalap otyrǵan jalǵyz organǵa ainaldy. Osy jerde ótkir máseleler kóteriledi, osynda ǵana shyndyq aitylady. Yqtimal jemqorlyq taqyrybyn kótergen depýtatty sotpen qorqytyp-úrkitýge jol berýge bolmaidy. Shatalovqa jasalǵan qysymǵa qalai jol berilmese, dál solai Bazarbekti de qorǵaý qajet”, — dedi ol.
Qorytyndylai kele ol Baqytjan Bazarbektiń jeke ustanymyna bailanysty sóz qozǵady.
“Baqytjan Jumabekuly!
Sizdiń depýtattyq saýalyńyz – adaldyqpen, zań aiasynda jáne halyqtyń múddesi úshin jasalǵan qadam. Sizden keshirim suraýdy talap etý – sizdiń saiasi karerańyzdy toqtatýǵa jasalǵan ashyq shabýyl. Halyq sizdiń jaǵyńyzda. Sizge senim de, abyroi da bar. Erte me, kesh pe, Antikor, Bas prokýratýra men Qarjylyq monitoring agenttigi MÁMS pen Densaýlyq saqtaý qory máselesin tereń zertteitini anyq”, — dep qosty ol.
Bul jaǵdaidan keiin Májilis depýtaty Baqytjan Bazarbek ózine qarsy sotqa aryz bergen taraptardyń kim ekenin málimdedi.
Onyń aitýynsha, densaýlyq saqtaý salasyndaǵy keibir mekemeler depýtattyń atyna sotqa shaǵym túsirgen. Bul týraly ol Joǵarǵy aýditorlyq palatanyń úkimettik saǵatynda aityp ótti. Sol jiynda depýtat MÁMS júiesindegi kemshilikterge qatysty naqty derekter keltirgen bolatyn.
“Sol málimettermen kelispegen meditsinalyq uiymdardyń biri meni sotqa berdi. Taǵy bir mekeme sotqa deiingi tártippen narazylyǵyn bildirip otyr. Olar ar-namysy men bedeline nuqsan keldi dep sanaidy. Maǵan: «Keshirim sura, áitpese advokat pen saraptama shyǵyndaryn óndirip alamyz» dep talap qoiyp otyr. Men buǵan kelispeimin. Aitqan pikirime olar filologiialyq saraptama júrgizgen eken. Biz de endi óz tarapymyzdan lingvistikalyq qorytyndy alamyz”, – dedi depýtat.
