Májilis depýtaty Baqytjan Bazarbek sot protsesteri men sý qoimalaryn memleket menshigine qaitarý máselesine baqylaýdy kúsheitý qajettigin málimdedi. Ol mysal retinde Almaty oblysyn keltirdi, dep habarlaidy Dalanews.kz.
Depýtattyń aitýynsha, Konstitýtsiiada tabiǵi resýrstar halyqqa tiesili ekeni jáne memleket olardy halyq atynan basqaratyny bekitilgenine qaramastan, sý qorynyń bir bóligi jeke menshikke ótip ketken jaǵdailar bar.
Bazarbek keibir ister boiynsha sottar memlekettiń ustanymyn qoldap, buryn jasalǵan kelisimderdi zańsyz dep tanyp jatqanyn aitty. Alaida uqsas basqa jaǵdailarda kerisinshe sheshimder qabyldanyp, bul sot tájiribesiniń birizdiligine qatysty suraqtar týyndatyp otyr.
Onyń sózinshe, Almaty oblysynda sý qoryn zańsyz ielikten shyǵarý faktileri boiynsha tekserýler sotqa deiin jetip, kei jaǵdaida sot memleket paidasyna sheshim shyǵarǵan.
«Almaty oblysyndaǵy tórt iri sý qoimasy buryn Bolat Nazarbaevtyń kezeńinde, onyń kómegimen, bir adamnyń qolyna zańsyz ótip ketken. Qazir olar memleket menshigine qaitaryldy», – dedi depýtat.
Sonymen qatar, májilismen sot tájiribesinde qarama-qaishy mysaldar da bar ekenin atap ótti. Atap aitqanda, Qapshaǵai sý qoimasynyń sý qorǵaý aimaqtaryndaǵy jerlerdi qaitarý boiynsha keibir isterde zańbuzýshylyqtar anyqtalǵanymen, uqsas protsesterde memlekettik organdardyń talaptary qanaǵattandyrylmaǵan.
Bazarbek Jer jáne Sý kodeksterine sáikes mundai aýmaqtar jeke menshikke berilmeýi tiis ekenin eske saldy. Onyń aitýynsha, bul ister boiynsha biryńǵai tásil bolýy qajet.
«Sýdialardyń ustanymy týraly uzaq talqylaýǵa bolady. Biraq zań talaptary anyq: sý qory nysandary men jerleri jeke menshikke berilmeýi kerek. Nege Almaty oblysynda zańsyz berilgen jerlerdi qaitarý kezinde qiyndyqtar týyndaidy? Zań bárine ortaq, oligarhtar úshin bólek ádilet bolmaýy tiis», – dedi ol.
Osyǵan bailanysty depýtat Bas prokýrordan Qapshaǵai sý qoimasy men Ile ózeni aýmaǵyndaǵy jerlerdi memleket menshigine qaitarýǵa qatysty talaptardy erekshe baqylaýǵa alýdy surady.
Sonymen qatar, tekseris qorytyndysy boiynsha 65 jer telimi boiynsha mámilelerdi jaramsyz dep taný jáne menshik quqyǵyn joiý úshin qosymsha talap-aryzdar berýdi usyndy.
