QR Parlamenti Májilisi baspasóz qyzmetiniń málimetinshe, Qazaqstanda Frantsýz damý agenttigi toby úshin quqyqtyq, salyqtyq jáne qarjylyq jaǵdailar qarastyrylady.
"Agenttiktiń barlyq qyzmetkerleri salyq salymynan bosatylady. Endi boryshkerlik operatsiialar aǵymdaǵy zańnama sheńberinde qaralatyn bolady", delingen habarlamada.
Frantsýz damý agenttigi toby qarajatty eýro, AQSh dollary nemese kez kelgen basqa valiýtada, óziniń mártebesine sáikes qarjylyq nemese tehnikalyq járdemdesýdiń kez kelgen nysanyn usynýǵa, memlekettik nemese jeke qurylymdarǵa konsýltatsiialyq qyzmetter, tehnikalyq járdemdesý jáne oqytý qyzmetterin usynýǵa quqyly. Onyń Qazaqstanda óz qyzmetin júzege asyrý úshin qajetti quqyq qabilettiligi bolady jáne sheteldik zańdy tulǵalardyń jeke menshiginde bolýǵa tyiym salynǵan jerlerdi qospaǵanda, jyljymaly-jyljymaityn múlikti ielene jáne oǵan bilik ete alady, sondai-aq sotqa júgine alady.
Kelisim Frantsýz damý agenttigi tobyn óz qyzmeti sheńberinde Qazaqstan Respýblikasynda korporativtik tabys salyǵyn tóleýden (tólem kózinen ustalatyn salyq tóleýdi qosa alǵanda) bosatýdy kózdeidi. Ol kelisimde kórsetilgen qyzmetti júzege asyrý úshin Qazaqstanda ókildik ashýǵa jáne ustaýǵa quqyly.
Frantsýz damý agenttigi toby men onyń ókildigi bank nemese basqa qarjy institýty mártebesine ie bolmaidy, sondyqtan jergilikti banktik erejelerge baǵynbaidy.
Aita ketsek, Frantsýz damý agenttigi damýshy elderge kómek berýmen ainalysady jáne qazirge deiin álemniń 80-nen astam elinde jumys júrgizedi. Sondai-aq, 60 jergilikti ókildigi qurylǵan. Toptyń negizgi qyzmetterine kedeilikpen kúres júrgizý, bul maqsatta memlekettik organdar men jeke kásiporyndarǵa grant, uzaqmerzimdi nesie, kepildikter berýmen ainalysady. Top quramyna PROPARCO jáne Expertise France syndy frantsiialyq kompaniialar kiredi.
