ق ر پارلامەنتى ءماجىلىسى باسپا ءسوز قىزمەتىنىڭ مالىمەتىنشە، قازاقستاندا فرانسۋز دامۋ اگەنتتىگى توبى ءۇشىن قۇقىقتىق، سالىقتىق جانە قارجىلىق جاعدايلار قاراستىرىلادى.
"اگەنتتىكتىڭ بارلىق قىزمەتكەرلەرى سالىق سالىمىنان بوساتىلادى. ەندى بورىشكەرلىك وپەراسيالار اعىمداعى زاڭناما شەڭبەرىندە قارالاتىن بولادى"، دەلىنگەن حابارلامادا.
فرانسۋز دامۋ اگەنتتىگى توبى قاراجاتتى ەۋرو، اقش دوللارى نەمەسە كەز كەلگەن باسقا ۆاليۋتادا، ءوزىنىڭ مارتەبەسىنە سايكەس قارجىلىق نەمەسە تەحنيكالىق جاردەمدەسۋدىڭ كەز كەلگەن نىسانىن ۇسىنۋعا، مەملەكەتتىك نەمەسە جەكە قۇرىلىمدارعا كونسۋلتاسيالىق قىزمەتتەر، تەحنيكالىق جاردەمدەسۋ جانە وقىتۋ قىزمەتتەرىن ۇسىنۋعا قۇقىلى. ونىڭ قازاقستاندا ءوز قىزمەتىن جۇزەگە اسىرۋ ءۇشىن قاجەتتى قۇقىق قابىلەتتىلىگى بولادى جانە شەتەلدىك زاڭدى تۇلعالاردىڭ جەكە مەنشىگىندە بولۋعا تىيىم سالىنعان جەرلەردى قوسپاعاندا، جىلجىمالى-جىلجىمايتىن مۇلىكتى يەلەنە جانە وعان بيلىك ەتە الادى، سونداي-اق سوتقا جۇگىنە الادى.
كەلىسىم فرانسۋز دامۋ اگەنتتىگى توبىن ءوز قىزمەتى شەڭبەرىندە قازاقستان رەسپۋبليكاسىندا كورپوراتيۆتىك تابىس سالىعىن تولەۋدەن (تولەم كوزىنەن ۇستالاتىن سالىق تولەۋدى قوسا العاندا) بوساتۋدى كوزدەيدى. ول كەلىسىمدە كورسەتىلگەن قىزمەتتى جۇزەگە اسىرۋ ءۇشىن قازاقستاندا وكىلدىك اشۋعا جانە ۇستاۋعا قۇقىلى.
فرانسۋز دامۋ اگەنتتىگى توبى مەن ونىڭ وكىلدىگى بانك نەمەسە باسقا قارجى ينستيتۋتى مارتەبەسىنە يە بولمايدى، سوندىقتان جەرگىلىكتى بانكتىك ەرەجەلەرگە باعىنبايدى.
ايتا كەتسەك، فرانسۋز دامۋ اگەنتتىگى دامۋشى ەلدەرگە كومەك بەرۋمەن اينالىسادى جانە قازىرگە دەيىن الەمنىڭ 80-نەن استام ەلىندە جۇمىس جۇرگىزەدى. سونداي-اق، 60 جەرگىلىكتى وكىلدىگى قۇرىلعان. توپتىڭ نەگىزگى قىزمەتتەرىنە كەدەيلىكپەن كۇرەس جۇرگىزۋ، بۇل ماقساتتا مەملەكەتتىك ورگاندار مەن جەكە كاسىپورىندارعا گرانت، ۇزاقمەرزىمدى نەسيە، كەپىلدىكتەر بەرۋمەن اينالىسادى. توپ قۇرامىنا PROPARCO جانە Expertise France سىندى فرانسيالىق كومپانيالار كىرەدى.
