Sóz joq, kezdesýde bilik bastama kóterip otyrǵan bir másele talqylanǵany sózsiz. Ol - qolma-qol tólemderden salyq jinaý mehanizmin engizý. «Kaspi bank» osy baǵyttyń sózsiz lideri bop otyr emes pe?
Bir nárse anyq: tiynyn sanap, onsyz da bilikti atarǵa oq taba almai otyrǵan halyqtyń tólemine salyq salyp, ashýlandyrýǵa bolmaidy. Bilik biýdjetti tolyqtyrǵysy keletini túsinikti. Biraq ol qolma-qol aqsha tólep, kúnin kórip jatqan qarapaiym halyqtyń qaltasyna qol salý arqyly júzege aspaýy tiis! Kerek bolsa, paidaly qazbalardy satyp, baiyp jatqan oligarhtarǵa salynatyn salyqty kóbeitsin. Sheteldegi ofshorlardaǵy qarjyny qaitarsyn!
Bilik salyq jeke adamdarǵa salynbaidy, bizneske salynady dep jatyr. Biraq bizneske salynǵan qosymsha salyq erteń avtomatty túrde baǵa men qyzmettiń kóterilýine alyp kelmei me? Ol da qarapaiym halyqqa qosymsha soqqy bolmai ma?!
Bir ǵana suraq.
Ekonomikany, jalpy ómirimizdi tsifrlandyrýǵa mindetti memlekettik organdar osy kúnge deiin ne bitirdi sonda?!
Jyl saiyn qyrýar qarjy jumsalady. Tutastai bir ministrlik jáne basqa da memlekettik jáne kvazimemlekettik qurylymdardy ustap turýǵa aqsha bólinedi. Biýdjet esebinen qomaqty qarjy qajet etetin tsifrlandyrý baǵdarlamalary qabyldanady.
Osynshama aqsha jumsalǵan ol qurylymdar qolma-qol aqshasyz tólemderdi damytýda bir jeke banktiń shańyna ilese qaldy.
Bálkim, tsifrlandyrý jónindegi memlekettik saiasatty túbegeili qaita qaraý kerek shyǵar?
Túiin. Árine, jeke menshik, jeke bastama, jeke jobalar kerek-aq. Sonymen birge memleket qaýipsizdigine tikelei qatysty strategiialyq salalardy tsifrlandyrýda memleket óziniń baqylaý fýnktsiialarynan qol úzbeý kerek dep oilaimyn.
Ámirjan Qosan
