Kaspi.kz aksıonerleri 2024 jyldyń III toqsanyna dıvıdend tóleý týraly sheshim qabyldady. Bir jaı aksıaǵa 850 teńge mólsherinde dıvıdend bekitilgen. Alaıda, KASE-de fınteh kompanıa jarıalaǵan qujatta jalpy soma naqtylanbaǵan, dep habarlaıdy Dalanews.kz.
Bırjada ornalastyrylǵan aksıalar sanyna (199 500 000 dana) súıensek, ol 169,6 mlrd teńgeni nemese III toqsandaǵy taza kiristiń 62%-yn quraıdy dep boljaýǵa bolady. Osy kezeńdegi qarjylyq eseptilikke sáıkes, Kaspi.kz 274,4 mlrd teńge tabys tapqan. Týra osyndaı somany otandyq kompanıa óz aksıonerlerine 2024 jyldyń I jáne II toqsandarynda da tólep úlgergen: I toqsanda shamamen 223 mlrd teńge, II toqsanda — 243 mlrd teńge. Aǵymdaǵy jyldyń toǵyz aıynda kompanıa 740,4 mlrd teńge tabys tapty.
Aıtqandaı, shilde aıynda Kaspi.kz 2024 jyldyń sońyna deıin taza kirisin 1 trln teńgege deıin nemese 2023 jyldaǵysynan (848,8 mlrd teńge) 25%-ǵa arttyrýdy josparlap otyrǵandaryn málimdegen. Sol kezde kompanıa óz ınvestorlaryna halyqaralyq ekspansıaǵa basymdyq beretinderin, ıaǵnı "ýaqyty kelgende, barlyq kapıtalyn osy maqsattarǵa baǵyttaýdan esh tartynbaıtyndaryn" aıtqan. Al qazan aıynda Kaspi.kz túriktiń elektrondy platformasy Hepsiburada-nyń 65,41% aksıasyn 1,13 mlrd dollarǵa satyp alǵaly jatqandaryn jarıalady. 20 qarashada Túrkıanyń retteýshi organy bul kelisimge ruqsat berdi. Osydan keıin bul rettegi mámile 2025 jyldyń I toqsanynyń sońyna deıin aıaqtalyp qalatyny jarıa etildi.
Qazirgi ýaqytta Kaspi.kz-nyń iri aksıonerleri Mıhaıl Lomtadze (21,53% úles), Vácheslav Kım (20,39% úles), sondaı-aq 23,78% úlesimen Baring Vostok qorlary bolyp tabylady. Qalǵan aksıalar paketi mınorıtarııler arasynda ózara bólip taratylǵan.
Esterińizge sala keteıik, 2024 jyldyń qańtarynda Kaspi.kz amerıkalyq NASDAQ qor bırjasynda IPO ótkizdi, onyń barysynda 1 mlrd dollardan astam qarajat tartyldy. Bıyl naýryz aıynda fıntehkompanıa London qor bırjasy tiziminen "LSE naryǵyndaǵy saýda-sattyq kóleminiń tómendigine baılanysty" óz qaǵazdaryn alyp tastady.
