Kaspi.kz اكسيونەرلەرى 2024 جىلدىڭ III توقسانىنا ديۆيدەند تولەۋ تۋرالى شەشىم قابىلدادى. ءبىر جاي اكسياعا 850 تەڭگە مولشەرىندە ديۆيدەند بەكىتىلگەن. الايدا، KASE-دە فينتەح كومپانيا جاريالاعان قۇجاتتا جالپى سوما ناقتىلانباعان، دەپ حابارلايدى Dalanews.kz.
بيرجادا ورنالاستىرىلعان اكسيالار سانىنا (199 500 000 دانا) سۇيەنسەك، ول 169،6 ملرد تەڭگەنى نەمەسە III توقسانداعى تازا كىرىستىڭ 62%-ىن قۇرايدى دەپ بولجاۋعا بولادى. وسى كەزەڭدەگى قارجىلىق ەسەپتىلىككە سايكەس، Kaspi.kz 274،4 ملرد تەڭگە تابىس تاپقان. تۋرا وسىنداي سومانى وتاندىق كومپانيا ءوز اكسيونەرلەرىنە 2024 جىلدىڭ I جانە II توقساندارىندا دا تولەپ ۇلگەرگەن: I توقساندا شامامەن 223 ملرد تەڭگە، II توقساندا — 243 ملرد تەڭگە. اعىمداعى جىلدىڭ توعىز ايىندا كومپانيا 740،4 ملرد تەڭگە تابىس تاپتى.
ايتقانداي، شىلدە ايىندا Kaspi.kz 2024 جىلدىڭ سوڭىنا دەيىن تازا كىرىسىن 1 ترلن تەڭگەگە دەيىن نەمەسە 2023 جىلداعىسىنان (848،8 ملرد تەڭگە) 25%-عا ارتتىرۋدى جوسپارلاپ وتىرعاندارىن مالىمدەگەن. سول كەزدە كومپانيا ءوز ينۆەستورلارىنا حالىقارالىق ەكسپانسياعا باسىمدىق بەرەتىندەرىن، ياعني "ۋاقىتى كەلگەندە، بارلىق كاپيتالىن وسى ماقساتتارعا باعىتتاۋدان ەش تارتىنبايتىندارىن" ايتقان. ال قازان ايىندا Kaspi.kz تۇرىكتىڭ ەلەكتروندى پلاتفورماسى Hepsiburada-نىڭ 65،41% اكسياسىن 1،13 ملرد دوللارعا ساتىپ العالى جاتقاندارىن جاريالادى. 20 قاراشادا تۇركيانىڭ رەتتەۋشى ورگانى بۇل كەلىسىمگە رۇقسات بەردى. وسىدان كەيىن بۇل رەتتەگى مامىلە 2025 جىلدىڭ I توقسانىنىڭ سوڭىنا دەيىن اياقتالىپ قالاتىنى جاريا ەتىلدى.
قازىرگى ۋاقىتتا Kaspi.kz-نىڭ ءىرى اكسيونەرلەرى ميحايل لومتادزە (21،53% ۇلەس)، ۆياچەسلاۆ كيم (20،39% ۇلەس)، سونداي-اق 23،78% ۇلەسىمەن Baring Vostok قورلارى بولىپ تابىلادى. قالعان اكسيالار پاكەتى مينوريتارييلەر اراسىندا ءوزارا ءبولىپ تاراتىلعان.
ەستەرىڭىزگە سالا كەتەيىك، 2024 جىلدىڭ قاڭتارىندا Kaspi.kz امەريكالىق NASDAQ قور بيرجاسىندا IPO وتكىزدى، ونىڭ بارىسىندا 1 ملرد دوللاردان استام قاراجات تارتىلدى. بيىل ناۋرىز ايىندا فينتەحكومپانيا لوندون قور بيرجاسى تىزىمىنەن "LSE نارىعىنداعى ساۋدا-ساتتىق كولەمىنىڭ تومەندىگىنە بايلانىستى" ءوز قاعازدارىن الىپ تاستادى.
