Biraq Jákishev shala-jansar kúide jatqan kásiporynnyń boiyna qan júgirtip, álemdik deńgeidegi alyp kásiporynǵa ainaldyrǵanyn bárimiz bilemiz.
Eger sol kezde Jákishev Balǵymbaeevtyń aitqanyn eki etpei oryndap, «QazAtomÓndiristi» qurdymǵa qulatyp jibergende bizde atom óndirisi múlde bolmas edi.
Al qazir ǵoi, «Qazaqstan álemde ýran óndirý boiynsha birinshi orynda turǵan el» dep bárimiz áńgime aitqanda keýdemizge nan piserdei bolady.
Tutas qazaq maqtanatyn alyp kásiporyndy aiaqqa turǵyzǵan Jákishevke alǵystan basqa aitarymyz joq.
Eger kezinde Nazarbaev rejimi Jákishevtiń sońyna sham alyp túsip, túrmege toǵytpaǵanda «QazAtomÓndiris» budan da qýatty, «Rosatomnyń» aldynda múlde bas imeitin álemdik kompaniiaǵa ainalar edi.
Muny biz aitpasaq ta, kópshilik jaqsy biledi.
Bizdiń aitpaǵymyz basqa. Taiaýda saparlap júrip «QazAtomÓndiris» kompaniiasynda jumys isteitin tanys jigitpen kezdesip qaldyq. Biraz áńgime aityldy.
Bir sátte esime sońǵy ýaqyttary Aqtaý qalasyndaǵy sý tushytatyn MAEK kásiporyny qatysty biraz áńgime aitylǵany esime túsip, áligi tanysqa:
– Bálensheke, Aqtaýdaǵy MAEK «QazAtomÓndiriske» qaraýshy edi. Ondaǵy jaǵdai qalai? Ótkende kásiporynǵa qatysty aqparat quraldarynda biraz áńgime taraǵanyn baiqadym. Ol jaqtaǵy jaǵdaiy qalai? – dep tanysyma suraqty tótesinen qoidym.
– Oi, qazir MAEK «QazAtomÓndiriske» qaramaidy. Sondyqtan ondaǵy jaǵdaidan habarsyzbyn, – dep tanysym áńgimeni qysqa qaiyrdy.
– Sonda qalai... MAEK qazir qaida qaraidy?
– «QazAtomÓndiris» Londondaǵy qor birjasyna shyǵar aldynda óziniń «toksichnyi» aktivterinen qutylý týrasynda sheshim qabyldanǵan-dy. Meniń bilýimshe, sol kezde MAEK birinshi kezekte QR Energetika ministrligine berildi, artynsha Mańǵystaý oblysy ákimdiginiń balansyna ótti, – dep tanysym óz bilgenimen bólisti.
Sol sátte jardyń jaǵasynda, tarqaýdyń az-aq aldynda turǵan «QazAtomÓndiristi» bankrot qylmai, jan-jaqty jumys istep, alyp kásiporynda tereń shyńyraýdan súirep shyqqan Muhtar Jákishevtiń beinesi kóz aldyma elestedi.
Eger Jákishev taǵy 5 jyl «QazAtomÓnidiriste» jumys istegende Aqtaýdaǵy MAEK te qoldan-qolǵa ótpei, tabysty kásiporynǵa ainalar ma edi degen oi sanamda qylań bergenin jasyryp qaiteiin. Biraq ol oidy eski tanysqa aitýdy artyq sanadym...
Iá, «QazAtomÓndiristi» mi batpaqtan sýyryp alǵan Jákishev Aqtaýdaǵy MAEK-ti «toksichnyi» kúige túsirmes edi ǵoi. Biraq jurttyń bári Jákishev emes qoi. Aitqanǵa kónbei, demi taýsylardyń sál aldynda turǵan kompaniiaǵa jan bitirdi emes pe?
«QazAtomÓndiris» kásiporynniń London qor birjasyna shyqqany jaqsy. Biraq alyp kásiporynnyń álemdik arenaǵa shyǵý úshin ózine tiesili salalyq kásiporyndy syrtqa tepkenin miǵa sidyra almai-aq qoidym.
Óitkeni atom óndirisine qatysty mekemeniń «QazAtomÓndirispen» qosarlana damyǵany durys emes pe? Al sizder qalai oilaisyzdar?
Nurlan JUMAHAN
