Sonyń biri – depýtat Jańbyrshin. Qańtar tragediiasynan keiin Toqaevtyń tóńiregine toptasqan "jańa esimderdiń" arasynda Edil myrzanyń aty aldymen atalady.
"Jańbyrshin júrgen jerde Jańa Qazaqstannyń lebi esedi" deidi májilismenniń kózqarasyn quptaityn qaýym.
Nazarbaevty nysanaǵa alyp, jyl basynan beri "eks-prezidenttiń áýletin álsiretý kerektigin" aitýdan tanbai kele jatqan Jańbyrshin kúni keshe taǵy bir surapyl málimdeme jasady.
Onyń pikirinshe júieni eski komandanyń ókilderinen tolyq tazartý qajet, onsyz ádildik ornamaidy.
Nazarbaevtyń semiasy men sybailastary áli de bolsa de yqpalyn joǵaltqan joq, olar saiasi reformalardy tejeýge tyrysady.
"Ádil memleket qurý úshin - shaldyń júiesin ózgertý kerek! Ádil ekonomika qurý úshin - qyz-kúieýdiń júiesin buzý kerek! Ádil qoǵam qurý úshin - inisiniń sektasyn joq qylý kerek...", – deidi depýtat óz kezeginde.
Áitse de álemjelidegi jurt Jańbyrshin sóziniń shynaiylyǵyna senbei otyr.
Jelidegi belsendiler depýtattyń Qańtarǵa deiingi eks-prezidentti Elbasy kúnimen quttyqtaǵan jazbasyn taýyp alǵan.
Osydan bir jyl buryn, Tuńǵysh prezident kúni qarsańynda Nazarbaevtyń adami qasietterin jipke tizip, onyń "Qazaqstan úshin jany aýyratynyn" aitqan Jańbyrshin kelesidei pikir bildirgen eken:
"Keńes imperiiasy ydyrap, myqty degen respýblikalar, olardyń basshylar abdyrap qalǵanda, Elbasy óz moinyna úlken jaýapkershilik alyp, eldi soǵyssyz, yń-shyńsyz, maidan qyl sýyrǵandai qylyp, Qazaqstandy alyp shyqty.
Mundai tektonikalyq ózgerister buryn sońdy bizdiń ómirimizde boldy ma? Osynyń bárin táýekelge baryp, bastaityn lider kerek edi.
Ony Qudai tańdady, elge sondai erdi berdi, el sońyna erdi!
Búgin sol erdiń, Tuńǵysh Prezidenttiń, Elbasynyń kúni! Qutty bolsyn! Denine saýlyq, otbasyna amandyq tileiik!", – depti Edil myrza.
Jańbyrshinniń eski jazbasy men sý jańa pikirin súzgiden ótkizgen kópshiliktiń depýtattan kóńili qalǵan syndy. Halyq qalaýlysyn "ekijúzdili" dep aiyptaǵan álemjelidegi qaýym: "Hameleondardyń qasynda Hamenova erkek eken. Sotta tursa da NÁN-ge qurmetim bólek dep ashyp aitty. Qubylǵan joq", – deidi.
Edil myrzanyń eskirgen pikirine keshirimmen qaraýdy suraǵan da tabylypty. Olardyń pikirinshe eski júiemen arpalysyp, Jańa Qazaqstandy ornatýǵa shyndap kirisken azamattardyń eteginen tartýǵa bolmaidy.
Aita ketelik, Edil Jańbyrshin Májilistegi "Jańa Qazaqstan" depýtattyq tobynyń belsendi múshesi.
https://dalanews.kz/aimak/83861-qangtar-tragediiasy-turaly-5-seriialy-fil
