Kúsh. Bilik. Jeńis. Qazaq batyrlarynyń esimi osy qasiettermen tyǵyz bailanysty. Qostanailyq zaýyt jumysshylary batyrlar men el igiligi úshin eńbek etip júrgen qazaqstandyq fermerler arasyndaǵy uqsastyqty atap ótti, dep habarlaidy Dalanews.kz.
Qazaqstandyq aýyl sharýashylyǵy tehnikasyn óndirýshi AGROMASH zaýyty "Jumysshy mamandyqtar qalasy" festivalinde óziniń jyl saiynǵy bestselleri – ESSIL kombainyn tanystyrdy. Bul erekshe tehnikaǵa Shaqshaq Jánibek batyrdyń beinesi salynǵan.
"Aýyl sharýashylyǵynda ár jyl bir-birine uqsamaidy, ár maýsym óz qiyndyqtary men synaqtaryn ala keledi. Sondyqtan 2023 jyly biz ESSIL kombaindaryna qazaq batyrlarynyń beinesin salýdy qolǵa aldyq. Bul arqyly biz ótkenniń, qazirgi zamannyń jáne bolashaqtyń patriottyq rýhyn biriktirýdi maqsat ettik. Aýyl sharýashylyǵynda eńbek etip júrgen adamdar da – bizdiń batyrlarymyz, óitkeni olar eldiń azyq-túlik qaýipsizdigin qamtamasyz etedi. Tabiǵattyń qatal jaǵdailaryna da tótep beredi. Bul bastamany biz úshinshi jyl qatarynan júzege asyryp kelemiz jáne ol AGROMASH zaýytynyń fermer-dostary arasynda úlken qoldaýǵa ie boldy", – deidi AGROMASH kompaniiasynyń kommertsiialyq direktory Nikolai Parhomenko.
Kombain tek fermerlerdi ǵana tańǵaldyrǵan joq. AGROMASH stendiniń janynda alǵashqy kúnnen-aq uzyn-sonar kezek paida boldy – kelýshiler batyrdyń beinesi salynǵan kombainmen sýretke túsýge asyqty. Olardyń qatarynda AGROMASH zaýytynda óndiristik tájiribeden ótip júrgen stýdentter de bar.
Kompaniia ókilderiniń aitýynsha, AGROMASH qazir orta jáne joǵary oqý oryndarymen tyǵyz jumys júrgizip jatyr. Jyl saiyn júzdegen stýdent dýaldy bilim berý baǵdarlamasy aiasynda óndiristik tájiribeden ótedi jáne keiin zaýytqa jumysqa ornalasý múmkindigine ie bolady.
Eske salaiyq, Astanadaǵy EXPO halyqaralyq kórme ortalyǵynda respýblikalyq «Jumysshy mamandyqtar qalasy» festivali bastaldy. Qazaqstan Respýblikasynyń Bilim jáne ǵylym ministrligi uiymdastyrǵan bul is-shara 15 aqpanǵa deiin jalǵasady. Kirý – barlyq qalaýshylarǵa tegin.
