Kezdesý barysynda shahar basshysy qalada atqarylǵan júieli jumystar men ońdy ózgeristerdi atap ótip, 2018 jyldyń jumys jospary men iske asyrylatyn jobalar týraly baiandady.
Onyń aitýynsha, ótken jyly qalada 4310 otbasy baspanaly bolǵan. Iaǵni, paidalanýǵa berilgen turǵyn úi kólemi 402 myń sharshy metrdi quraǵan. Bul kórsetkish 2016 jylmen salystyrǵanda 36 paiyzǵa artyq. Al «Óńirlerdi damytý – 2020» memlekettik baǵdarlamasy aiasynda 21 kópqabatty úige jańartý jáne jóndeý jumystary júrgizilse, jeti úige seismikalyq kúsheitý jumystary, demeýshilerdiń esebinen 33 kóp qabatty ǵimarattyń qasbeti jóndelgen. Sondai-aq ótken jyly alty shaǵyn aýdanda elektr jelisi tartylyp, nátijesinde 1550 abonent sapaly elektr jelisine qosylǵan. Al qala turǵyndaryn aýyzsýmen qamtý kórsetkishi 93 paiyzdy qurasa, biyl bul kórsetkishti 96 paiyzǵa jetkizý josparlanyp otyr. Buǵan qosa 2017 jyly qala aýmaǵynda káriz júielerin tartý jumysy da atqarylǵan.
Budan bólek jiynda turǵyndar qala ákimine kommýnaldyq máseleler, qoǵamdyq kólik qyzmeti men jol jáne jer máselesi jaiynda saýaldaryn joldady. Jiyndy qorytyndylaǵan oblys ákimi J.Túimebaev Elbasy Joldaýyndaǵy basymdyqtardy basty baǵytqa ala otyryp jumys júrgizýdi qala basshylyǵyna tapsyrdy.
Oblystyń joǵarǵy kórsetkishterge qol jetkizýinde Shymkent qalasynyń úlesi erekshe ekenin aitqan aimaq basshysy qala óz potentsialyn durys paidalanyp keletinin jetkizdi. Sonymen birge ákim aldaǵy ýaqytta atqarylatyn jumystar kóp ekenin atap ótip, kelesidei mindetterdi júzege asyrýdy tapsyrdy.
– Kishi jáne orta biznesti qarqyndy damytý arqyly qala ekonomikasyn kóleńkeden shyǵaryp, biýdjettiń kiris kózin ulǵaitý baǵytyndaǵy jumystardy kúsheitýdi. Memlekettik-jekeshelik áriptestik aiasynda áleýmettik nysandar sanyn arttyrýdy jáne qoǵamdyq kólik salasyn damytyp, qalanyń jasyl beldeýin qalyptastyrýdy, «Tsitadel» men «Shymkent-siti» jobasyn júzege asyrýdy, Qoshqar ata ózeniniń boiyn abattandyrý siiaqty 20 negizgi jobany júzege asyrýdy júkteimin, – dedi ákim.
Budan basqa aimaq basshysy qala aýmaǵyndaǵy zańsyz qurylys nysandaryn joiýdy, qala turǵyndaryn sapaly aýyz sýmen, gazben, elektr qýatymen qamtamasyz etý qarqynyn joǵarylatýdy, 2018 jyldyń 1 qańtarynan bastap jańa formattaǵy ataýly áleýmettik kómek enzilýine bailanysty shartty ataýly áleýmettik kómek quramynda eńbekke qabiletti múshelerin jumyspen qamtý belsendi sharalaryna qatystyryp, jumyssyzdyq deńgeiin barynsha tómendetýdi jáne turǵyn úi qurylysynyń qarqynyn arttyryp, turǵyndardy páterlermen qamtamasyz etý júiesin ary qarai damytýdy tapsyrdy.
OQO ákiminiń baspasóz qyzmeti
