كەزدەسۋ بارىسىندا شاھار باسشىسى قالادا اتقارىلعان جۇيەلى جۇمىستار مەن وڭدى وزگەرىستەردى اتاپ ءوتىپ، 2018 جىلدىڭ جۇمىس جوسپارى مەن ىسكە اسىرىلاتىن جوبالار تۋرالى باياندادى.
ونىڭ ايتۋىنشا، وتكەن جىلى قالادا 4310 وتباسى باسپانالى بولعان. ياعني، پايدالانۋعا بەرىلگەن تۇرعىن ءۇي كولەمى 402 مىڭ شارشى مەتردى قۇراعان. بۇل كورسەتكىش 2016 جىلمەن سالىستىرعاندا 36 پايىزعا ارتىق. ال «وڭىرلەردى دامىتۋ – 2020» مەملەكەتتىك باعدارلاماسى اياسىندا 21 كوپقاباتتى ۇيگە جاڭارتۋ جانە جوندەۋ جۇمىستارى جۇرگىزىلسە، جەتى ۇيگە سەيسميكالىق كۇشەيتۋ جۇمىستارى، دەمەۋشىلەردىڭ ەسەبىنەن 33 كوپ قاباتتى عيماراتتىڭ قاسبەتى جوندەلگەن. سونداي-اق وتكەن جىلى التى شاعىن اۋداندا ەلەكتر جەلىسى تارتىلىپ، ناتيجەسىندە 1550 ابونەنت ساپالى ەلەكتر جەلىسىنە قوسىلعان. ال قالا تۇرعىندارىن اۋىزسۋمەن قامتۋ كورسەتكىشى 93 پايىزدى قۇراسا، بيىل بۇل كورسەتكىشتى 96 پايىزعا جەتكىزۋ جوسپارلانىپ وتىر. بۇعان قوسا 2017 جىلى قالا اۋماعىندا كارىز جۇيەلەرىن تارتۋ جۇمىسى دا اتقارىلعان.
بۇدان بولەك جيىندا تۇرعىندار قالا اكىمىنە كوممۋنالدىق ماسەلەلەر، قوعامدىق كولىك قىزمەتى مەن جول جانە جەر ماسەلەسى جايىندا ساۋالدارىن جولدادى. جيىندى قورىتىندىلاعان وبلىس اكىمى ج.تۇيمەبايەۆ ەلباسى جولداۋىنداعى باسىمدىقتاردى باستى باعىتقا الا وتىرىپ جۇمىس جۇرگىزۋدى قالا باسشىلىعىنا تاپسىردى.
– شىمكەنت قالاسىنىڭ تۇرعىندارى وبلىس حالقىنىڭ ۇشتەن ءبىرىن قۇرايتىندىقتان مۇندا جەر قاتىناستارى، تۇرعىن ءۇي، قوعامدىق كولىككە قاتىستى ماسەلەردىڭ كوپ ەكەنى انىق. ونىڭ بارلىعى دا كەزەڭ-كەزەڭىمەن شەشىلەتىن بولادى. 2014 جىلى قالاعا 70 مىڭ گەكتار جەر قوسىلىپ، اۋماعى 117 مىڭ گەكتارعا جەتتى. قالاعا قوسىلعان ەلدى مەكەندەردى رەتكە كەلتىرۋ جۇمىستارى جىل سايىن جۇرگىزىلىپ كەلەدى. سىزدەردە ءوز تاراپتارىڭىزدان اۋلالارىڭىزدى كورىكتەندىرىپ، ۇيلەردى ارلەۋ سىندى جۇمىستاردى جۇرگىزۋدە بەلسەندى بولۋلارىڭىزدى سۇرايمىن. بىرگە ارەكەت ەتسەك قانا تۇراتىن جەرىمىزدى كوركەيتىپ، شىمكەنتىمىزدى جاسىل قالاعا اينالدىرا الامىز. 2020 جىلى ءبىزدىڭ قالا تمد ەلدەرىنىڭ مادەني استاناسى اتانادى. ءقازىردىڭ وزىندە وسى باعىتتا جۇمىستى باستاپ كەتتىك. ەندى وعان شاھاردىڭ ءار تۇرعىنى دا ءوز ۇلەسىن قوسۋى ءتيىس، – دەدى ج.تۇيمەبايەۆ.
وبلىستىڭ جوعارعى كورسەتكىشتەرگە قول جەتكىزۋىندە شىمكەنت قالاسىنىڭ ۇلەسى ەرەكشە ەكەنىن ايتقان ايماق باسشىسى قالا ءوز پوتەنسيالىن دۇرىس پايدالانىپ كەلەتىنىن جەتكىزدى. سونىمەن بىرگە اكىم الداعى ۋاقىتتا اتقارىلاتىن جۇمىستار كوپ ەكەنىن اتاپ ءوتىپ، كەلەسىدەي مىندەتتەردى جۇزەگە اسىرۋدى تاپسىردى.
– كىشى جانە ورتا بيزنەستى قارقىندى دامىتۋ ارقىلى قالا ەكونوميكاسىن كولەڭكەدەن شىعارىپ، بيۋدجەتتىڭ كىرىس كوزىن ۇلعايتۋ باعىتىنداعى جۇمىستاردى كۇشەيتۋدى. مەملەكەتتىك-جەكەشەلىك ارىپتەستىك اياسىندا الەۋمەتتىك نىساندار سانىن ارتتىرۋدى جانە قوعامدىق كولىك سالاسىن دامىتىپ، قالانىڭ جاسىل بەلدەۋىن قالىپتاستىرۋدى، «سيتادەل» مەن «شىمكەنت-سيتي» جوباسىن جۇزەگە اسىرۋدى، قوشقار اتا وزەنىنىڭ بويىن اباتتاندىرۋ سياقتى 20 نەگىزگى جوبانى جۇزەگە اسىرۋدى جۇكتەيمىن، – دەدى اكىم.
بۇدان باسقا ايماق باسشىسى قالا اۋماعىنداعى زاڭسىز قۇرىلىس نىساندارىن جويۋدى، قالا تۇرعىندارىن ساپالى اۋىز سۋمەن، گازبەن، ەلەكتر قۋاتىمەن قامتاماسىز ەتۋ قارقىنىن جوعارىلاتۋدى، 2018 جىلدىڭ 1 قاڭتارىنان باستاپ جاڭا فورماتتاعى اتاۋلى الەۋمەتتىك كومەك ەنزىلۋىنە بايلانىستى شارتتى اتاۋلى الەۋمەتتىك كومەك قۇرامىندا ەڭبەككە قابىلەتتى مۇشەلەرىن جۇمىسپەن قامتۋ بەلسەندى شارالارىنا قاتىستىرىپ، جۇمىسسىزدىق دەڭگەيىن بارىنشا تومەندەتۋدى جانە تۇرعىن ءۇي قۇرىلىسىنىڭ قارقىنىن ارتتىرىپ، تۇرعىنداردى پاتەرلەرمەن قامتاماسىز ەتۋ جۇيەسىن ارى قاراي دامىتۋدى تاپسىردى.
وقو اكىمىنىڭ باسپا ءسوز قىزمەتى
