Qonaev qalasynyń ákimi Ashat Berdihanov Bas jospar men Keshendi damý josparyna sáikes atqarylyp jatqan jumystarmen tanysty.
Qazirgi tańda Bas jospar aiasynda №8-10 shaǵyn aýdandarynyń joly kúrdeli jóndeýden ótýde. Bul jol Abai kóshesi arqyly Arna aýyly men 10-shaǵyn aýdandy jalǵastyrady. Merdiger – «Asar stroi» JShS.
Kóshe 4 jolaqty, uzyndyǵy 14,3 shaqyrymdy quraidy. Sonymen qatar shaǵyn aýdandardyń ishindegi 12 kósheniń jolyna aǵymdaǵy jóndeý jasalady. Jobanyń aiaqtalý merzimi 2025 jylǵa josparlanǵan.
Qurylys basyna barǵan ákim merdigerdi synǵa aldy.
«Munyń bári halyq úshin jasalyp jatyr. Al sizder sozyp júrsizder. Aqsha bólingen, jobalyq-smetalyq qujaty daiyn. Hattama toltyrylyp, is baqylaýǵa alynady», - dedi Ashat Berdihanov.
Keshendi damý josparyna kelsek, 2023-2027 jyldar aralyǵynda infraqurylymdy damytýǵa arnalǵan 187 joba júzege aspaq. Biyl 51 jobanyń qujattary ázirlenýde. Onyń ishinde 10-y jańa jol salý men kúrdeli jóndeýden ótkizýge qatysty. Shahar basshysy qurylys júretin kóshelerdi aralap, jolaýshylar kóligi jáne avtomobil joldary bóliminiń basshysyna birqatar tapsyrma júktedi.
