Úkimettiń keńeitilgen otyrysynda Qasym-Jomart Toqaev kommýnaldyq-energetikalyq sektordy jańǵyrtý jumystaryn jedeldetý kerektigin mindettedi, dep habarlaidy Dalanews.kz.
"Eldi mekenderdiń tynys-tirshiligine qajetti barlyq júie úzdiksiz jumys isteýin qamtamasyz etý mańyzdy. Bul – Úkimet pen ákimdikterdiń negizgi mindetiniń biri. Alaida, jyl saiyn jylytý maýsymynda sol bir problemalar qaitalana beredi.
Memlekettik organdar qatelikter men olqylyqtardan sabaq almaidy. Sonyń kesirinen osy sala qazirgi múshkil halge jetip otyr. Almatydaǵy ekinshi jylý elektr ortalyǵyndaǵy bý-gaz qondyrǵysynyń qurylysy sozylyp ketti", - dedi Memleket basshysy.
Ol Ekibastuzdaǵy birinshi GRES-tiń energoblogyn qalpyna keltire almai júrgenimizge on jyldan asqanyn (2012 jyldan beri) atap ótti.
"Sondai-aq Ekibastuzdaǵy ekinshi GRES-ti keńeitý jáne kúrdeli jóndeý jobasy ýaqtyly júzege asyrylmai jatyr. Úkimet, eń aldymen, biyl apatty jaǵdaidaǵy 19 jylý ortalyǵyn jańǵyrtý jumystaryn aiaqtaýǵa tiis. Sonymen qatar qýaty 700 megavattan asatyn qosymsha qýat kózimen qamtamasyz etý kerek. Belgilengen merzimdi shegerýge bolmaidy", - dedi Toqaev.
Jalpy, elimiz elektr, jylý, sý óndirý jáne jetkizý qýatynyń tapshylyǵyn sezinip otyrǵany jasyryn emes. Balqash jylý elektr ortalyǵy qurylysynyń aiaqtalmai qalýy, tabiǵi monopoliia sýbektileriniń ashyq jumys istemeýi, sondai-aq tarifterdiń ósimin qoldan tejeý – osynyń bári kezinde jiberilgen qatelikterdiń saldary.
"Salaǵa túbegeili reforma júrgizgen jón. Ol úshin júieli jumys atqarý qajet", - dedi Prezident.
