جىل سايىن جىلىتۋ ماۋسىمىندا سول ءبىر پروبلەمالار قايتالانا بەرەدى - توقايەۆ

ازامات قويشىعارا 07 اقپ. 2024 11:54 319

ۇكىمەتتىڭ كەڭەيتىلگەن وتىرىسىندا قاسىم-جومارت توقايەۆ كوممۋنالدىق-ەنەرگەتيكالىق سەكتوردى جاڭعىرتۋ جۇمىستارىن جەدەلدەتۋ كەرەكتىگىن مىندەتتەدى، دەپ حابارلايدى Dalanews.kz.

"ەلدى مەكەندەردىڭ تىنىس-تىرشىلىگىنە قاجەتتى بارلىق جۇيە ۇزدىكسىز جۇمىس ىستەۋىن قامتاماسىز ەتۋ ماڭىزدى. بۇل – ۇكىمەت پەن اكىمدىكتەردىڭ نەگىزگى مىندەتىنىڭ ءبىرى. الايدا، جىل سايىن جىلىتۋ ماۋسىمىندا سول ءبىر پروبلەمالار قايتالانا بەرەدى.

مەملەكەتتىك ورگاندار قاتەلىكتەر مەن ولقىلىقتاردان ساباق المايدى. سونىڭ كەسىرىنەن وسى سالا قازىرگى مۇشكىل حالگە جەتىپ وتىر. الماتىداعى ەكىنشى جىلۋ ەلەكتر ورتالىعىنداعى بۋ-گاز قوندىرعىسىنىڭ قۇرىلىسى سوزىلىپ كەتتى"، - دەدى مەملەكەت باسشىسى.

ول ەكىباستۇزداعى ءبىرىنشى گرەس-تىڭ ەنەرگوبلوگىن قالپىنا كەلتىرە الماي جۇرگەنىمىزگە ون جىلدان اسقانىن (2012 جىلدان بەرى) اتاپ ءوتتى.

"سونداي-اق ەكىباستۇزداعى ەكىنشى گرەس-تى كەڭەيتۋ جانە كۇردەلى جوندەۋ جوباسى ۋاقتىلى جۇزەگە اسىرىلماي جاتىر. ۇكىمەت، ەڭ الدىمەن، بيىل اپاتتى جاعدايداعى 19 جىلۋ ورتالىعىن جاڭعىرتۋ جۇمىستارىن اياقتاۋعا ءتيىس. سونىمەن قاتار قۋاتى 700 مەگاۆاتتان اساتىن قوسىمشا قۋات كوزىمەن قامتاماسىز ەتۋ كەرەك. بەلگىلەنگەن مەرزىمدى شەگەرۋگە بولمايدى"، - دەدى توقايەۆ.

جالپى، ەلىمىز ەلەكتر، جىلۋ، سۋ ءوندىرۋ جانە جەتكىزۋ قۋاتىنىڭ تاپشىلىعىن سەزىنىپ وتىرعانى جاسىرىن ەمەس. بالقاش جىلۋ ەلەكتر ورتالىعى قۇرىلىسىنىڭ اياقتالماي قالۋى، تابيعي مونوپوليا سۋبەكتىلەرىنىڭ اشىق جۇمىس ىستەمەۋى، سونداي-اق تاريفتەردىڭ ءوسىمىن قولدان تەجەۋ – وسىنىڭ ءبارى كەزىندە جىبەرىلگەن قاتەلىكتەردىڭ سالدارى.

"سالاعا تۇبەگەيلى رەفورما جۇرگىزگەن ءجون. ول ءۇشىن جۇيەلى جۇمىس اتقارۋ قاجەت"، - دەدى پرەزيدەنت.


ۇسىنىلعان
سوڭعى جاڭالىقتار
x