Kásipker Rahat Bashirbaevtyń anasy Baqyt Tanekeeva men naǵashy ápkesi Nazerke Tanekeeva jastaiynan analarynyń qara sabyndy qalai qainatatynyn kórip, talai ret qolqabys ta etken. Keiin sol retsept boiynsha ápkeli-sińliler úi jaǵdaiynda qara sabyn qainatyp, sata bastaǵan bolatyn. Sondyqtan Rahattyń «Aýyl amanaty» baǵdarlamasynyń múmkindikterimen tanysyp, biznes ashqysy keletinin estigen kezde aǵaiyndy Tanekeevalar Rahatqa sharýashylyqta kúndelikti qoldanylatyn kir sabyn óndirisin qolǵa alý týraly keńes bergen.
Rahat Bashirbaev baǵdarlama aiasynda 5,1 mln teńgeden astam qarjy alyp, oǵan Ózbekstannan kir sabyn shyǵaratyn arnaiy qurylǵy satyp alǵan. Sóitip olar Basqunshy aýylynda óz garajdaryn tseh retinde qaita jabdyqtap, quraldar ornatyp, sharýany bastap ketti.
– Bala kezimizde anam sekseýildiń, alabotanyń kúlinen qara sabyn qainatyp jatatyn. Qol kúshimen jasalatyn sol eńbek protsesteri áli kóz aldymda. Jańa kásip bastaý týraly oi kelgende aǵaiyndy ápke-baýyrlarymyzben birge ózimizge etene tanys kir sabyn jasaý isine kiriseiik dep sheshtik.
Qazir tsehta ónim daiyndaý, iaǵni qospalardy qainatý, sabyn túrinde óńdep shyǵarý, arnaiy qalyptarǵa quiý, qondyrǵylar arqyly túrli kólemge keltirý – bári de arnaiy apparatpen atqarylady. Sondyqtan ónim shyǵarý áldeqaida tez jáne ońai, – deidi Nazerke Tanekeeva.
Jas kásipker Nazerke jaqynda suiyq untaq jasaýdy Almatydan arnaiy úirenip qaitqan. Aldaǵy ýaqytta ony da tsehta óndirip shyǵarýdy kózdep otyr. Sol siiaqty jaz mezgilinde túrli shópterden qara sabyn jasaýdy jalǵastyrmaqshy. Nazerke qazirgi kezde nieti bar jandarǵa kir sabyn, qara sabyn men suiyq untaq jasaýdyń ádis-tásilderin úiretetin sheberlik saǵatyn ótkizip bastady.
– Suiyq untaq ózi únemdi, ózi allergiia týǵyzbaityn taza, qosh iisti. Sondyqtan kir sabynmen birge onyń da qalai daiyndalatynyn úiretemin. Bilgenimdi basqalarmen bólisip, olardyń da osylai óz isterin ashýyna septigin tigizsem, jaqsy ǵoi, – deidi ol.
Tseh qańtardyń basynan iske qosylyp, sońǵy 1 aptada 72%-tik 100 keli sabyn óndirilgen. Búginde shaǵyn kásiporynda jasalǵan ónimderdiń óz tutynýshylary qalyptasyp úlgeripti. Sabynǵa negizinen bazarlardaǵy, dúkenderdegi shaǵyn kásip ieleri tapsyrys beredi.
Tseh jumysy Instagram áleýmettik jelisinde naz.26.07.1981 paraqshasy arqyly nasihattalyp keledi.
– Qazirgi kezde ǵimaratqa jylytý júiesin júrgizý kezek kúttirmeitin másele bolyp otyr. Aldaǵy ýaqytta jylý júiesin jasap, tsehymyzdyń irgesin odan ári keńeitsek, taralý aýqymyn ulǵaityp, eksportqa shyǵarsaq degen de úlken josparlarymyz bar, – deidi N. Tanekeeva.
Jalpy Panfilov aýdanynda «Aýyl amanaty» baǵdarlamasynyń I, II transhtary boiynsha 93 sýbektiniń jobasy maquldanyp, olarǵa jalpy kólemi 662 mln. teńgeden astam nesie berip, azamattar shaǵyn kásipterin bastaǵan.
(Fotosýretter Nazerke Tanekeevanyń jeke arhivinen alynǵan)
