كاسىپكەر راحات باشيربايەۆتىڭ اناسى باقىت تانەكەيەۆا مەن ناعاشى اپكەسى نازەركە تانەكەيەۆا جاستايىنان انالارىنىڭ قارا سابىندى قالاي قايناتاتىنىن كورىپ، تالاي رەت قولقابىس تا ەتكەن. كەيىن سول رەسەپت بويىنشا اپكەلى-سىڭلىلەر ءۇي جاعدايىندا قارا سابىن قايناتىپ، ساتا باستاعان بولاتىن. سوندىقتان راحاتتىڭ «اۋىل اماناتى» باعدارلاماسىنىڭ مۇمكىندىكتەرىمەن تانىسىپ، بيزنەس اشقىسى كەلەتىنىن ەستىگەن كەزدە اعايىندى تانەكەيەۆالار راحاتقا شارۋاشىلىقتا كۇندەلىكتى قولدانىلاتىن كىر سابىن ءوندىرىسىن قولعا الۋ تۋرالى كەڭەس بەرگەن.
راحات باشيربايەۆ باعدارلاما اياسىندا 5،1 ملن تەڭگەدەن استام قارجى الىپ، وعان وزبەكستاننان كىر سابىن شىعاراتىن ارنايى قۇرىلعى ساتىپ العان. ءسويتىپ ولار باسقۇنشى اۋىلىندا ءوز گاراجدارىن سەح رەتىندە قايتا جابدىقتاپ، قۇرالدار ورناتىپ، شارۋانى باستاپ كەتتى.
– بالا كەزىمىزدە انام سەكسەۋىلدىڭ، الابوتانىڭ كۇلىنەن قارا سابىن قايناتىپ جاتاتىن. قول كۇشىمەن جاسالاتىن سول ەڭبەك پروسەستەرى ءالى كوز الدىمدا. جاڭا كاسىپ باستاۋ تۋرالى وي كەلگەندە اعايىندى اپكە-باۋىرلارىمىزبەن بىرگە وزىمىزگە ەتەنە تانىس كىر سابىن جاساۋ ىسىنە كىرىسەيىك دەپ شەشتىك.
ءقازىر سەحتا ءونىم دايىنداۋ، ياعني قوسپالاردى قايناتۋ، سابىن تۇرىندە وڭدەپ شىعارۋ، ارنايى قالىپتارعا قۇيۋ، قوندىرعىلار ارقىلى ءتۇرلى كولەمگە كەلتىرۋ – ءبارى دە ارنايى اپپاراتپەن اتقارىلادى. سوندىقتان ءونىم شىعارۋ الدەقايدا تەز جانە وڭاي، – دەيدى نازەركە تانەكەيەۆا.
كاسىپكەر سابىن جاساۋعا قاجەتتى قوسپارلاردى نەگىزىنەن الماتىدان جانە جەرگىلىكتى جەردەن الادى. قوسپالار تۋرالى ايتساق، ءونىم جاساۋعا توڭ ماي، ياعني قوي مەن سيىردىڭ ءىش مايى، قىزدىرىلعان فريتيۋر مايى، كاۋستيكالىق سودا، ەمدىك قاسيەتى بار گۇلشەتەن، شاي اعاشىنىڭ مايى سياقتى ءتۇرلى ەفير مايلارى قولدانىلادى. ەفير مايلارىنىڭ تۇرلەرى تاپسىرىس بەرۋشىنىڭ سۇرانىسىنا قاراي قوسىلادى.
جاس كاسىپكەر نازەركە جاقىندا سۇيىق ۇنتاق جاساۋدى الماتىدان ارنايى ۇيرەنىپ قايتقان. الداعى ۋاقىتتا ونى دا سەحتا ءوندىرىپ شىعارۋدى كوزدەپ وتىر. سول سياقتى جاز مەزگىلىندە ءتۇرلى شوپتەردەن قارا سابىن جاساۋدى جالعاستىرماقشى. نازەركە قازىرگى كەزدە نيەتى بار جاندارعا كىر سابىن، قارا سابىن مەن سۇيىق ۇنتاق جاساۋدىڭ ادىس-تاسىلدەرىن ۇيرەتەتىن شەبەرلىك ساعاتىن وتكىزىپ باستادى.
– سۇيىق ۇنتاق ءوزى ۇنەمدى، ءوزى اللەرگيا تۋعىزبايتىن تازا، قوش ءيىستى. سوندىقتان كىر سابىنمەن بىرگە ونىڭ دا قالاي دايىندالاتىنىن ۇيرەتەمىن. بىلگەنىمدى باسقالارمەن ءبولىسىپ، ولاردىڭ دا وسىلاي ءوز ىستەرىن اشۋىنا سەپتىگىن تيگىزسەم، جاقسى عوي، – دەيدى ول.
سەح قاڭتاردىڭ باسىنان ىسكە قوسىلىپ، سوڭعى 1 اپتادا 72%-تىك 100 كەلى سابىن وندىرىلگەن. بۇگىندە شاعىن كاسىپورىندا جاسالعان ونىمدەردىڭ ءوز تۇتىنۋشىلارى قالىپتاسىپ ۇلگەرىپتى. سابىنعا نەگىزىنەن بازارلارداعى، دۇكەندەردەگى شاعىن كاسىپ يەلەرى تاپسىرىس بەرەدى.
سەح جۇمىسى ينستاگرام الەۋمەتتىك جەلىسىندە naz.26.07.1981 پاراقشاسى ارقىلى ناسيحاتتالىپ كەلەدى.
– قازىرگى كەزدە عيماراتقا جىلىتۋ جۇيەسىن جۇرگىزۋ كەزەك كۇتتىرمەيتىن ماسەلە بولىپ وتىر. الداعى ۋاقىتتا جىلۋ جۇيەسىن جاساپ، سەحىمىزدىڭ ىرگەسىن ودان ءارى كەڭەيتسەك، تارالۋ اۋقىمىن ۇلعايتىپ، ەكسپورتقا شىعارساق دەگەن دە ۇلكەن جوسپارلارىمىز بار، – دەيدى ن. تانەكەيەۆا.
جالپى پانفيلوۆ اۋدانىندا «اۋىل اماناتى» باعدارلاماسىنىڭ ءى، ءىى ترانشتارى بويىنشا 93 سۋبەكتىنىڭ جوباسى ماقۇلدانىپ، ولارعا جالپى كولەمى 662 ملن. تەڭگەدەن استام نەسيە بەرىپ، ازاماتتار شاعىن كاسىپتەرىن باستاعان.
(فوتوسۋرەتتەر نازەركە تانەكەيەۆانىڭ جەكە ارحيۆىنەن الىنعان)
