Oǵan kásipkerlikti damytý jónindegi ulttyq joba sheńberinde biznes-ideiasyn iske asyrýǵa berilgen 5 mln teńge somasyndaǵy grant zor kómek boldy.
Almagúl Muratbek hanym grantqa qajetti qural-jabdyqtardy satyp alyp, úi jaǵdaiynda qaq óndirisin jolǵa qoia bastady.
Osylaisha Eskeldi aýdanynan shyqqan kásipker hanym "Qonaq Kade" brendiniń negizin qalai bastady. Qazir jergilikti jemis-jidekterden qaqtyń birneshe túrin jasaidy. Onyń dámdi, eń bastysy tabiǵi ári paidaly ónimderine degen suranys qazirdiń ózinde artyp otyr.
– Óz biznes-ideiamdy júzege asyrý úshin Almaty qalasynan Eskeldi aýdanynyń Qaratal aýylyna kóship keldim. Óitkeni munda jergilikti fermerler qulpynai men tańqýraidy jaqsy ósiredi. Keide tekelilik turǵyndardan da jidekter satyp alamyn. Negizi farmatsevt mamanmyn. Biraq biznespen ainalysyp, paidaly ónim shyǵarǵym keldi. Bul maqsatyma memlekettik qoldaýdyń arqasynda qol jetkizdim, – deidi kásipker.
Onyń aitýynsha, qaq óndirý qarapaiym protsess, ony kez kelgen áiel úiinde jasai alady.
– Qai-qaisymyz da bala kezimizde almadan qaq jasaǵanbyz, men de solardyń birimin. Biraq qazir arnaiy qural-jabdyqtardyń arqasynda jumys burynǵydan áldeqaida jeńildedi. Árine, azyq-túlik jinaýǵa, jemis-jidekterdi jýýǵa, tasymaldaityn ydystarǵa salýǵa kóp ýaqyt ketedi. Biraq blenderdi paidalaný ýaqytty edáýir únemdeidi. Munan soń daiyn qoimaljyń 10-12 saǵatqa degidratorǵa keptirý úshin jiberiledi. Osy ýaqyt aralyǵynda basqa sharýalaryńyzben ainalysýyńyzǵa bolady.
Naryqta jaima qaq óte qymbat. Degenmen bizde ósetin jemis-jidekterdiń túri kóp. Sondyqtan jyl boiy sapaly ári paidaly jergilikti ónim óndirýdi jolǵa qoiyp, turaqty tabys alýǵa bolady, – deidi oi bólisken Almagúl Muratbek.
Jaqynda Almagúl Muratbek «Bir aýyl – bir ónim» jobasynyń jeńimpazy atandy. Sol siiaqty «Qorǵas» HShYO aýmaǵynda ótken halyqaralyq kórmege qatysyp qaitty.
Búginde shaǵyn biznesin júrgizip, eki adamdy turaqty jumyspen qamtyp otyr. Óńirlik kásipkerler palatasy ótkizetin master-klasstar sheńberinde tájiribe almasýǵa belsendi qatysady. Aldaǵy ýaqytta kooperativ qurý esebinen óndirisin ulǵaityp, jumysshylar sanyn arttyryp, úlken naryqqa shyqsam degen jospary bar.
