وعان كاسىپكەرلىكتى دامىتۋ جونىندەگى ۇلتتىق جوبا شەڭبەرىندە بيزنەس-يدەياسىن ىسكە اسىرۋعا بەرىلگەن 5 ملن تەڭگە سوماسىنداعى گرانت زور كومەك بولدى.
الماگۇل مۇراتبەك حانىم گرانتقا قاجەتتى قۇرال-جابدىقتاردى ساتىپ الىپ، ءۇي جاعدايىندا قاق ءوندىرىسىن جولعا قويا باستادى.
وسىلايشا ەسكەلدى اۋدانىنان شىققان كاسىپكەر حانىم "Qonaq Kade" برەندىنىڭ نەگىزىن قالاي باستادى. ءقازىر جەرگىلىكتى جەمىس-جيدەكتەردەن قاقتىڭ بىرنەشە ءتۇرىن جاسايدى. ونىڭ ءدامدى، ەڭ باستىسى تابيعي ءارى پايدالى ونىمدەرىنە دەگەن سۇرانىس ءقازىردىڭ وزىندە ارتىپ وتىر.
– ءوز بيزنەس-يدەيامدى جۇزەگە اسىرۋ ءۇشىن الماتى قالاسىنان ەسكەلدى اۋدانىنىڭ قاراتال اۋىلىنا كوشىپ كەلدىم. ويتكەنى مۇندا جەرگىلىكتى فەرمەرلەر قۇلپىناي مەن تاڭقۋرايدى جاقسى وسىرەدى. كەيدە تەكەلىلىك تۇرعىنداردان دا جيدەكتەر ساتىپ الامىن. نەگىزى فارماسيەۆت مامانمىن. ءبىراق بيزنەسپەن اينالىسىپ، پايدالى ءونىم شىعارعىم كەلدى. بۇل ماقساتىما مەملەكەتتىك قولداۋدىڭ ارقاسىندا قول جەتكىزدىم، – دەيدى كاسىپكەر.
ونىڭ ايتۋىنشا، قاق ءوندىرۋ قاراپايىم پروسەسس، ونى كەز كەلگەن ايەل ۇيىندە جاساي الادى.
– قاي-قايسىمىز دا بالا كەزىمىزدە المادان قاق جاساعانبىز، مەن دە سولاردىڭ ءبىرىمىن. ءبىراق ءقازىر ارنايى قۇرال-جابدىقتاردىڭ ارقاسىندا جۇمىس بۇرىنعىدان الدەقايدا جەڭىلدەدى. ارينە، ازىق-تۇلىك جيناۋعا، جەمىس-جيدەكتەردى جۋۋعا، تاسىمالدايتىن ىدىستارعا سالۋعا كوپ ۋاقىت كەتەدى. ءبىراق بلەندەردى پايدالانۋ ۋاقىتتى ەداۋىر ۇنەمدەيدى. مۇنان سوڭ دايىن قويمالجىڭ 10-12 ساعاتقا دەگيدراتورعا كەپتىرۋ ءۇشىن جىبەرىلەدى. وسى ۋاقىت ارالىعىندا باسقا شارۋالارىڭىزبەن اينالىسۋىڭىزعا بولادى.
نارىقتا جايما قاق وتە قىمبات. دەگەنمەن بىزدە وسەتىن جەمىس-جيدەكتەردىڭ ءتۇرى كوپ. سوندىقتان جىل بويى ساپالى ءارى پايدالى جەرگىلىكتى ءونىم ءوندىرۋدى جولعا قويىپ، تۇراقتى تابىس الۋعا بولادى، – دەيدى وي بولىسكەن الماگۇل مۇراتبەك.
جاقىندا الماگۇل مۇراتبەك «ءبىر اۋىل – ءبىر ءونىم» جوباسىنىڭ جەڭىمپازى اتاندى. سول سياقتى «قورعاس» حشىو اۋماعىندا وتكەن حالىقارالىق كورمەگە قاتىسىپ قايتتى.
بۇگىندە شاعىن بيزنەسىن جۇرگىزىپ، ەكى ادامدى تۇراقتى جۇمىسپەن قامتىپ وتىر. وڭىرلىك كاسىپكەرلەر پالاتاسى وتكىزەتىن ماستەر-كلاسستار شەڭبەرىندە تاجىريبە الماسۋعا بەلسەندى قاتىسادى. الداعى ۋاقىتتا كووپەراتيۆ قۇرۋ ەسەبىنەن ءوندىرىسىن ۇلعايتىپ، جۇمىسشىلار سانىن ارتتىرىپ، ۇلكەن نارىققا شىقسام دەگەن جوسپارى بار.
