Jetisýǵa Shveitsariiadan resmi delegatsiia keldi
Ótken jyly ózara yntymaqtastyq jóninde eki jaqty qol qoiylǵan memorandýmnyń jalǵasy retindegi osy kezdesý barysynda aýyl sharýashylyǵy, týrizm, turmystyq qatty qaldyqtardy óńdeý salalary boiynsha seriktestik máseleleri talqylandy.
– Almaty oblysy aýyl sharýashylyǵy ónimderiniń respýblikadaǵy jalpy kóleminiń 17-20 %-in óndiredi. Sondyqtan biz úshin aýyl sharýashylyǵy ónimderin óńdeýdi damytýdyń mańyzy zor. Osyǵan orai bizdi sizderdiń tehnologiialaryńyz qyzyqtyrady. Bizdiń kásipkerlerdiń sizderdiń biznes ortalaryńyzben ózara tyǵyz qarym-qatynas ornatqanyn qalaimyz. Ol úshin bizde barlyq jaǵdai bar: jaily investitsiialyq klimat jasalǵan, infraqurylymmen tolyq qamtamasyz etilgen arnaiy indýstrialdyq aimaqtar bar. Sizderden týrizmdi damytý, sonyń ishinde taý týrizmin damytý jaǵynan úirenerimiz kóp. Óitkeni bizdiń tabiǵi-klimattyq ereksheligimiz dál osy baǵytty damytýǵa qolaily. Sonymen qatar biz turmystyq qatty qaldyqtardy óńdeý isi erekshe qyzyqtyrady. Ótken jyly Astana qalasynda qos tarap yntymaqtastyq ornatý nietimen memorandýmǵa qol qoiǵan bolatynbyz. Búgingi kezdesý sol yntymaqtastyqtyń jalǵasy dep bilemiz, – dedi oblys ákimi A. Batalov.
Óz kezeginde Ýrs Shmid myrza Jetisý ólkesi óziniń erekshe kórkem tabiǵatymen tánti etkenin atap ótti. Oblys ortalyǵy Taldyqorǵan qalasy óziniń kógaldarymen, ásem kelbetimen unaǵan. Bul óńirdiń infraqurylymy jaqsy damyǵany, aýyl sharýashylyǵynyń áleýeti zor ekeni baiqalyp turǵanyn da tilge tiek etti.
– Shveitsariialyq kompaniialarda Almaty oblysyna investitsiia tartýǵa nietti. Óńir óziniń infraqurylymymen tartymdy. Oblys naryǵynda túrli iri halyqaralyq kompaniialar tabysty jumys istep kele jatqanyn bilemiz. Biz óz tarapymyzdan jańa aityp ótkendei, aýyl sharýashylyǵy, týrizm, logistika, TÚKSh, jasyl energetikany damytý salalary boiynsha áriptestik bailanys ornatqymyz keledi. Eń bastysy – ózara túsinistikte, birlesip biznes júrgizý, – dedi diplomat. Munan soń sóz alǵan Tichino saýda-ónerkásip palatasynyń resmi ókili Albert Lotti myrza da kantonnyń biznes qaýymdastyǵy Almaty oblysymen ózara yntymaqtasa jumys isteýge ázir ekendigin jetkizdi.
Kezdesýdi qorytyndylaǵan Amandyq Batalov delegatsiiaǵa Jetisý jerine kelgen sapary úshin rizashylyǵyn bildirip, seriktestik bailanystyń nátijeli bolatynyna senim bildirdi.
Budan keiin resmi delegatsiia oblys taýar óndirýshileriniń kórmesi qoiylǵan Taldyqorǵandaǵy Kórme keshenine bardy. Sapardyń jalǵasy retinde V2V formatynda oblys kásipkerleriniń qatysýymen biznes-forým ótti.
Búgin shveitsariialyqtardyń sapary jasyl energetikany damytý boiynsha Qapshaǵai qalasynda jalǵasady. Tichino kantonynyń ókilderi «Samuryq Grin Enerdji» JShS-nyń kún elektr stansasy men jel energetikasyna mamandanǵan «ANNAR» JShS-da bolady dep kútilýde.
Almaty oblysy ákiminiń baspasóz qyzmeti
https://dalanews.kz/35553
