Taldyqorǵan qalasyndaǵy demeýshi kompaniianyń qarajatyna turǵyzylǵan 60 páterli 5 qabatty jańa úi «Hareket» qaiyrymdylyq qory arqyly turǵyn úi kezeginde turǵan áleýmettik osal sanattaǵy azamattarǵa berildi.
Olardyń qatarynda tolyq emes jáne kóp balaly otbasylar, múgedektigi bar adamdar, erekshe qajettiligi bar balalardy tárbielep otyrǵan otbasylar, turmysy aýyr otbasylar bar. Bul úide 30 úsh bólmeli jáne 15 eki bólmeli páter bar.
Jańa qonys ielerin Respýblika kúnimen quttyqtaǵan oblys ákimi Beibit Isabaev biyl óńirde 2000-ǵa jýyq otbasy jańa páterge ie bolatynyn, solardyń birqatary búgin baspanalaryna kiretinin atap ótti. Qurylystyń osyndai qarqynyn saqtai otyryp, 3-4 jyl ishinde oblys ortalyǵyndaǵy kezekti 50%-ǵa qysqartýǵa bolatynyn aitty:
– Sońǵy jyldary Taldyqorǵanda páter máselesi ózekti boldy. Biz qalyptasqan jaǵdaidy jaqsartý úshin tiisti sharalardy qabyldadyq. Ókinishke qarai memlekettik qordan beriletin turǵyn úi kezeginde 15-20 jyl boiy turý – tek bizdiń oblysta ǵana oryn alyp otyrǵan jait emes. Bul – bizdiń kinámiz, ol úshin keshirim suraimyn.
Endi elektrondyq kezekti engizýdiń arqasynda biz ádildik pen ashyqtyq qaǵidatyn qatań saqtai otyryp, páter bólýdiń ashyqtyǵyn qamtamasyz ettik. Bul týraly Prezident únemi aityp keledi.
Al búgin, merekede qabyldanyp jatqan sharalardyń arqasynda halyqtyń áleýmettik osal toptarynyń ishinen taldyqorǵandyq 60 otbasy demeýshi kompaniia men qaiyrymdylyq qordyń qoldaýymen qonystoi qýanyshyna kenelip otyr.
Jyl basynda metsenattardyń kómegimen bir 60 páterli úidi qoldanysqa berdik, búgin taǵy bireýin, eki aptadan keiin 60 páterlik taǵy bireýin paidalanýǵa berýdi josparlap otyrmyz. Osylaisha, ómirlik qiyn jaǵdaiǵa tap bolǵan halyqtyń áleýmettik osal toptarynan kezekte turǵan 180 azamat kópten kútken baspanalaryna demeýshilerdiń qoldaýynyń arqasynda tegin qol jetkizdi. Úidi salǵan demeýshi kompaniia – «Eurotranzit Terminal» jaýapkershiligi shekteýli seriktestigine jáne «Hareket» qaiyrymdylyq qorynyń ókilderine alǵysymdy bildiremin. Barshańyzdy Respýblika kúnimen jáne qonys toilaryńyzben taǵy da quttyqtaimyn! Shańyraqtaryńyz shattyqqa tolsyn! – dedi Beibit Isabaev.
«Eurotranzit Terminal» JShS direktorynyń orynbasary Sergei Gordienko turǵyndarǵa quttytaý tilegin bildirdi:
– Bizdiń kompaniia áleýmettik mańyzdy jobalarǵa únemi qatysady. Taldyqorǵan qalasynyń ákimdigimen jasalǵan memorandýmǵa sáikes 60 páterlik úi salyp, bul úi búgin kezekte turǵandarǵa tegin berilip otyr. Turǵyn úi degen – jai ǵana qabyrǵadan, tóbeden, shatyrdan turatyn ǵimarat emes, bul – kómekke muqtaj otbasylar úshin úmit shyraǵy, qutty qonys, – dedi ol.
Qor ókilderiniń atynan onyń quryltaishylarynyń biri Madiiar Serikbaev sóz aldy. Qordyń jumysyna toqtalǵan ol 6 jyl ishinde qor muqtaj jandarǵa 1000-nan astam páter bergenin aitty:
– Qýanyshymdy sózben aityp jetkize almaimyn. Búgin taǵy 60 otbasynyń sheksiz qýanyshyna kýá bolyp otyrmyz. Jetisý oblysynda bizdiń qoldaýymyzben osy alpys otbasyn qosqanda barlyǵy 182 otbasy jańa qonysqa kirdi, – dedi ol.
Baspanaǵa qol jetkizgenderdiń biri – jeti bala tárbielep otyrǵan Áliia Tazabekova. Ol osydan 12 jyl buryn turǵyn úige kezegine turǵan:
– Búgin merekede úsh bólmeli páterdiń kiltterin qolyma aldym. Bul – bizdiń úlken otbasymyz úshin eń baqytty kúnderdiń biri. Úlken qyzym 18 jasta, kenje ulym nebári 5 ailyq. Úilengenimizge 20 jyl boldy. Ózimniń mamandyǵym – aspaz. Kúieýim jumys isteidi. Úi satyp alýǵa múmkindigimiz joq. Jaldamaly páterdiń birinen birine kóship júrýden sharshadyq, ári qiyn, ári qymbat. Búgin kópten kútken qýanyshty sátimiz týdy. Shyn júrekten rizamyz, – deidi jańa qonys iesi.
Atap ótsek, búgin Aqsý aýdanynyń turǵyndary da merekelik qonys toiyn atap ótti. Kezekte turǵandarǵa 50 páterdiń kilti berildi. Olardyń arasynda jetim balalar, kóp balaly jáne tolyq emes otbasylar, múgedek adamdar, apatty úilerde turatyn otbasylar bar.
Jansúgirov aýylyndaǵy bul jalgerlik kóp páterli úidi salýǵa biýdjetten 855 mln. 709 myń teńge bólingen. Turǵyn úidiń qurylysyn «Ritm Stroi» JShS ótken jyldyń maýsym aiynan bastap júrgizdi.
Jyl basynan beri Jetisý oblysynda ár túrli qarjylandyrý kózderi esebinen 198,4 myń sharshy metr turǵyn úi paidalanýǵa berildi, bul rette 1100-ge jýyq otbasy, onyń ishinde 145 kópbalaly jáne 158 az qamtylǵan otbasy jańa qonysqa ie boldy.
Fotograf: Jeńis Ysqabai
