Jetisý oblysynda Uly Otan soǵysyndaǵy Jeńistiń 80 jyldyǵyna orai 300-ge jýyq shara ótkizý josparlanǵan. Bul mereitoilyq sharalar jyl basynan bastalyp, búginge deiin jalǵasyp keledi,- dep habarlaidy Dalanews.kz
Josparlanǵan mádeni-buqaralyq, patriottyq is-sharalar óńirdiń barlyq aýdan-qalalarynda ótýde, bul rette jyldaǵy qalyptasqan dástúr boiynsha jergilikti jerlerde 9 mamyrda óńir basshylyǵy UOS ardagerlerin úilerine baryp quttyqtaidy, sondai-aq Uly Otan soǵysy jaýyngerlerine arnalǵan eskertkishter men obeliskilerge gúl shoqtaryn qoiý rásimine qatysady.
Máselen, Taldyqorǵandaǵy bir kóshege Keńes Odaǵynyń Batyry, Halyq Qaharmany, Armiia generaly, tuńǵysh Qorǵanys ministri Saǵadat Nurmaǵanbetovtiń esimi beriledi. Sonymen qatar «Urpaqqa uran bolǵan Uly Jeńis» atty jetisýlyq maidangerlerge qatysty derekterden turatyn jinaq shyǵarylyp, kópshilikke arnaiy tanystyrylady dep josparlanyp otyr. Al B.Rimova atyndaǵy Taldyqorǵan drama teatry S.Aleksievichtiń «Soǵystyń surqy áielge jat» spektaklin kórermen nazaryna usynbaq.
M. Tynyshbaev atyndaǵy oblystyq tarihi-ólketaný mýzeii men onyń filialdarynda, kórkemóner galereiasynda, oblys kitaphanalarynda Jeńistiń mánin uǵyndyratyn kitap jáne fotosýret kórmeleri uiymdastyrylyp, taqyryptyq ekskýrsiialar júrgiziledi.
Taǵylymdy isten jastar da tys qalǵan joq. Qaiyrymdylyq aktsiiasy aiasynda erikti jastardyń qatysýymen jetisýlyq tyl jáne eńbek ardagerlerine túrli baǵytta 140-tan astam qaiyrymdylyq kómek sharalary kórsetildi. Sondai-aq, óńirde sáýir aiynan bastap 9 mamyrǵa deiin densaýlyq ailyǵy júrip jatyr. Ailyq aiasynda dárigerlerdiń mobildi brigadalary UOS qatysýshylary men tyl ardagerlerine emhanalarda da, úi jaǵdaiynda da tegin meditsinalyq tekserýler men konsýltatsiialyq-diagnostikalyq kómek kórsetýde.
Al áleýmettik qoldaý sharalaryna kelsek, biyl Uly Otan soǵysynyń qatysýshylary men múgedekterine, sondai-aq olarǵa teńestirilgenderge birjolǵy materialdyq kómek kórsetýge – jalpy sany 3 215 adamǵa 393,8 mln.teńge bólindi. Atap aitqanda, 3 maidangerge 5 mln. teńgeden, sol siiaqty 1564 tyl eńbekkerine 100 myń teńgeden bir rettik qarjylai kómek berildi. Otan soǵysyna qatysýshylar men múgedekterine materialdyq qoldaýdan bólek, kommýnaldyq shyǵyndaryna 3 ailyq eseptik kórsetkish mólsherinde ai saiynǵy ótemaqy túrinde jeńildikter qarastyrylǵan. Sondai-aq UOS múgedekterine jáne olarǵa teńestirilgen múgedektigi bar ardagerlerge ońaltýdyń jeke baǵdarlamasy negizinde jáne qajettiligine qarai tehnikalyq ońaltý quraldary beriledi. Sonymen qatar UOS ardagerleri men olarǵa teńestirilgen tyl eńbekkerlerine jylyna bir ret sanatorii-kýrorttyq emdelýge tegin joldama beriledi. Atap aitqanda, biyl óńirde 243 ardagerdi qamtýǵa 50 mln.teńge qarastyrylǵan.
Jalpy oblys kóleminde Uly Otan soǵysy ardagerlerine arnalǵan 112 eskertkishi bar desek, jergilikti biýdjet qarajaty esebinen sonyń 74-ine kúrdeli jáne aǵymdaǵy jóndeý jumystary, qalǵan 38-ine demeýshiler esebinen abattandyrý jáne aǵymdy jóndeý jumystary júrgizilýde.
"Uly Otan soǵysyndaǵy Jeńistiń 80 jyldyǵyna orai ásirese jastardyń qatysýymen is-sharalar ótkizý óskeleń urpaqqa patriottyq tárbie berýge, beibitshilikti, birlik pen kelisimdi saqtaý men nyǵaitýǵa, onyń qundylyǵyn uǵyndyrýǵa kóp septigin tigizedi. Ardagerlerimizge qamqorlyq jasap, jan-jaqty qoldaý - bizdiń ortaq paryzymyz. Memleket basshysy aitqandai, «Biz ákelerimiz ben analarymyzdyń, soǵys ardagerleri men tyl eńbekkerleriniń adamzat tarihyndaǵy óshpes erligin árdaiym este saqtaýǵa tiispiz", - dedi oblystyq ardagerler keńesiniń tóraǵasy Ermek Kelemseiit.
