جەتىسۋ وبلىسىندا ۇلى وتان سوعىسىنداعى جەڭىستىڭ 80 جىلدىعىنا وراي 300-گە جۋىق شارا وتكىزۋ جوسپارلانعان. بۇل مەرەيتويلىق شارالار جىل باسىنان باستالىپ، بۇگىنگە دەيىن جالعاسىپ كەلەدى،- دەپ حابارلايدى Dalanews.kz
جوسپارلانعان مادەني-بۇقارالىق، پاتريوتتىق ءىس-شارالار ءوڭىردىڭ بارلىق اۋدان-قالالارىندا وتۋدە، بۇل رەتتە جىلداعى قالىپتاسقان ءداستۇر بويىنشا جەرگىلىكتى جەرلەردە 9 مامىردا ءوڭىر باسشىلىعى ۇوس ارداگەرلەرىن ۇيلەرىنە بارىپ قۇتتىقتايدى، سونداي-اق ۇلى وتان سوعىسى جاۋىنگەرلەرىنە ارنالعان ەسكەرتكىشتەر مەن وبەليسكىلەرگە گۇل شوقتارىن قويۋ راسىمىنە قاتىسادى.
ماسەلەن، تالدىقورعانداعى ءبىر كوشەگە كەڭەس وداعىنىڭ باتىرى، حالىق قاھارمانى، ارميا گەنەرالى، تۇڭعىش قورعانىس ءمينيسترى ساعادات نۇرماعانبەتوۆتىڭ ەسىمى بەرىلەدى. سونىمەن قاتار «ۇرپاققا ۇران بولعان ۇلى جەڭىس» اتتى جەتىسۋلىق مايدانگەرلەرگە قاتىستى دەرەكتەردەن تۇراتىن جيناق شىعارىلىپ، كوپشىلىككە ارنايى تانىستىرىلادى دەپ جوسپارلانىپ وتىر. ال ب.ريموۆا اتىنداعى تالدىقورعان دراما تەاترى س.الەكسييەۆيچتىڭ «سوعىستىڭ سۇرقى ايەلگە جات» سپەكتاكلىن كورەرمەن نازارىنا ۇسىنباق.
م. تىنىشبايەۆ اتىنداعى وبلىستىق تاريحي-ولكەتانۋ مۋزەيى مەن ونىڭ فيليالدارىندا، كوركەمونەر گالەرەياسىندا، وبلىس كىتاپحانالارىندا جەڭىستىڭ ءمانىن ۇعىندىراتىن كىتاپ جانە فوتوسۋرەت كورمەلەرى ۇيىمداستىرىلىپ، تاقىرىپتىق ەكسكۋرسيالار جۇرگىزىلەدى.
تاعىلىمدى ىستەن جاستار دا تىس قالعان جوق. قايىرىمدىلىق اكسياسى اياسىندا ەرىكتى جاستاردىڭ قاتىسۋىمەن جەتىسۋلىق تىل جانە ەڭبەك ارداگەرلەرىنە ءتۇرلى باعىتتا 140-تان استام قايىرىمدىلىق كومەك شارالارى كورسەتىلدى. سونداي-اق، وڭىردە ءساۋىر ايىنان باستاپ 9 مامىرعا دەيىن دەنساۋلىق ايلىعى ءجۇرىپ جاتىر. ايلىق اياسىندا دارىگەرلەردىڭ ءموبيلدى بريگادالارى ۇوس قاتىسۋشىلارى مەن تىل ارداگەرلەرىنە ەمحانالاردا دا، ءۇي جاعدايىندا دا تەگىن مەديسينالىق تەكسەرۋلەر مەن كونسۋلتاسيالىق-دياگنوستيكالىق كومەك كورسەتۋدە.
ال الەۋمەتتىك قولداۋ شارالارىنا كەلسەك، بيىل ۇلى وتان سوعىسىنىڭ قاتىسۋشىلارى مەن مۇگەدەكتەرىنە، سونداي-اق ولارعا تەڭەستىرىلگەندەرگە ءبىرجولعى ماتەريالدىق كومەك كورسەتۋگە – جالپى سانى 3 215 ادامعا 393،8 ملن.تەڭگە ءبولىندى. اتاپ ايتقاندا، 3 مايدانگەرگە 5 ملن. تەڭگەدەن، سول سياقتى 1564 تىل ەڭبەككەرىنە 100 مىڭ تەڭگەدەن ءبىر رەتتىك قارجىلاي كومەك بەرىلدى. وتان سوعىسىنا قاتىسۋشىلار مەن مۇگەدەكتەرىنە ماتەريالدىق قولداۋدان بولەك، كوممۋنالدىق شىعىندارىنا 3 ايلىق ەسەپتىك كورسەتكىش مولشەرىندە اي سايىنعى وتەماقى تۇرىندە جەڭىلدىكتەر قاراستىرىلعان. سونداي-اق ۇوس مۇگەدەكتەرىنە جانە ولارعا تەڭەستىرىلگەن مۇگەدەكتىگى بار ارداگەرلەرگە وڭالتۋدىڭ جەكە باعدارلاماسى نەگىزىندە جانە قاجەتتىلىگىنە قاراي تەحنيكالىق وڭالتۋ قۇرالدارى بەرىلەدى. سونىمەن قاتار ۇوس ارداگەرلەرى مەن ولارعا تەڭەستىرىلگەن تىل ەڭبەككەرلەرىنە جىلىنا ءبىر رەت ساناتوريي-كۋرورتتىق ەمدەلۋگە تەگىن جولداما بەرىلەدى. اتاپ ايتقاندا، بيىل وڭىردە 243 ارداگەردى قامتۋعا 50 ملن.تەڭگە قاراستىرىلعان.
جالپى وبلىس كولەمىندە ۇلى وتان سوعىسى ارداگەرلەرىنە ارنالعان 112 ەسكەرتكىشى بار دەسەك، جەرگىلىكتى بيۋدجەت قاراجاتى ەسەبىنەن سونىڭ 74-ىنە كۇردەلى جانە اعىمداعى جوندەۋ جۇمىستارى، قالعان 38-ىنە دەمەۋشىلەر ەسەبىنەن اباتتاندىرۋ جانە اعىمدى جوندەۋ جۇمىستارى جۇرگىزىلۋدە.
"ۇلى وتان سوعىسىنداعى جەڭىستىڭ 80 جىلدىعىنا وراي اسىرەسە جاستاردىڭ قاتىسۋىمەن ءىس-شارالار وتكىزۋ وسكەلەڭ ۇرپاققا پاتريوتتىق تاربيە بەرۋگە، بەيبىتشىلىكتى، بىرلىك پەن كەلىسىمدى ساقتاۋ مەن نىعايتۋعا، ونىڭ قۇندىلىعىن ۇعىندىرۋعا كوپ سەپتىگىن تيگىزەدى. ارداگەرلەرىمىزگە قامقورلىق جاساپ، جان-جاقتى قولداۋ - ءبىزدىڭ ورتاق پارىزىمىز. مەملەكەت باسشىسى ايتقانداي، «ءبىز اكەلەرىمىز بەن انالارىمىزدىڭ، سوعىس ارداگەرلەرى مەن تىل ەڭبەككەرلەرىنىڭ ادامزات تاريحىنداعى وشپەس ەرلىگىن ءاردايىم ەستە ساقتاۋعا ءتيىسپىز"، - دەدى وبلىستىق ارداگەرلەر كەڭەسىنىڭ ءتوراعاسى ەرمەك كەلەمسەيىت.
