Qazaqstan halqy Assambleiasynyń 30 jyldyǵyna orai Taldyqorǵan qalasyndaǵy «Dostyq úii» mańynan jańa alleia ashyldy. «Dostyq alleiasynyń» ashylý saltanatyna oblys basshylyǵy, Assambleia ókilderi jáne jastar qatysyp, ýaqyt kapsýlasyn qoidy,- dep habarlaidy Dalanews.kz
Osy kúni saltanatty sharaǵa qatysýshylar alleiaǵa 30 túp katalpa aǵashynyń kóshetin otyrǵyzdy. Oblys ákiminiń orynbasary Dias Esdáýletov, qoǵam qairatkeri Atsalim Idigov jáne belsendi jastar qatarynan Ekaterina Podgornaia bolashaqqa baǵyttalǵan tilek jazylǵan ýaqyt kapsýlasyn ornalastyrdy. Ýaqyt kapsýlasy 2030 jyly, iaǵni QHA 35 jyldyǵynda alynyp, oqylatyn bolady.
Osy sharaǵa belsene qatysqandar arasynda I. Jansúgirov atyndaǵy ýniversitettiń Qazaqstan halqy Assambleiasy kafedrasynyń meńgerýshisi Barhýdar Gýsenov te bar.
- Búgingi otyrǵyzylǵan kóshetterdiń 30 degen sany kezdeisoq tańdalǵan joq. Ol – Assambleianyń 30 jyldyq tarihyndaǵy tatýlyq pen turaqtylyqtyń, túrli etnostardyń bir shańyraq astynda beibit ómir súrip kele jatqanyn bildiretin simvol. Ár otyrǵyzylǵan tal – tabiǵatqa degen qamqorlyqtyń ǵana emes, el bolashaǵyna qaldyrylǵan rýhani muranyń, úmittiń de kórinisi. Al «Bolashaqqa hat» ýaqyt kapsýlasynyń salyný – búgingi urpaqtyń erteńgi kúnge degen senimi, eldiń bolashaǵyna amanat etken júrek sózi dep bilemin, - deidi ol.
Osylaisha, atalmysh alleia Taldyqorǵan qalasynyń halyq demalatyn kórnekti oryndarynyń birine ainalmaq.
Qatysýshylar shara sońynda estelik sýretke túsip, aqsaqaldar sharany uiymdastyrýshylar men jastarǵa aqjoltai tilekterin bildirdi.
