قازاقستان حالقى اسسامبلەياسىنىڭ 30 جىلدىعىنا وراي تالدىقورعان قالاسىنداعى «دوستىق ءۇيى» ماڭىنان جاڭا اللەيا اشىلدى. «دوستىق اللەياسىنىڭ» اشىلۋ سالتاناتىنا وبلىس باسشىلىعى، اسسامبلەيا وكىلدەرى جانە جاستار قاتىسىپ، ۋاقىت كاپسۋلاسىن قويدى،- دەپ حابارلايدى Dalanews.kz
وسى كۇنى سالتاناتتى شاراعا قاتىسۋشىلار اللەياعا 30 ءتۇپ كاتالپا اعاشىنىڭ كوشەتىن وتىرعىزدى. وبلىس اكىمىنىڭ ورىنباسارى دياس ەسداۋلەتوۆ، قوعام قايراتكەرى اتساليم يديگوۆ جانە بەلسەندى جاستار قاتارىنان ەكاتەرينا پودگورنايا بولاشاققا باعىتتالعان تىلەك جازىلعان ۋاقىت كاپسۋلاسىن ورنالاستىردى. ۋاقىت كاپسۋلاسى 2030 جىلى، ياعني قحا 35 جىلدىعىندا الىنىپ، وقىلاتىن بولادى.
وسى شاراعا بەلسەنە قاتىسقاندار اراسىندا ءى. جانسۇگىروۆ اتىنداعى ۋنيۆەرسيتەتتىڭ قازاقستان حالقى اسسامبلەياسى كافەدراسىنىڭ مەڭگەرۋشىسى بارحۋدار گۋسەنوۆ تە بار.
- بۇگىنگى وتىرعىزىلعان كوشەتتەردىڭ 30 دەگەن سانى كەزدەيسوق تاڭدالعان جوق. ول – اسسامبلەيانىڭ 30 جىلدىق تاريحىنداعى تاتۋلىق پەن تۇراقتىلىقتىڭ، ءتۇرلى ەتنوستاردىڭ ءبىر شاڭىراق استىندا بەيبىت ءومىر ءسۇرىپ كەلە جاتقانىن بىلدىرەتىن سيمۆول. ءار وتىرعىزىلعان تال – تابيعاتقا دەگەن قامقورلىقتىڭ عانا ەمەس، ەل بولاشاعىنا قالدىرىلعان رۋحاني مۇرانىڭ، ءۇمىتتىڭ دە كورىنىسى. ال «بولاشاققا حات» ۋاقىت كاپسۋلاسىنىڭ سالىنۋ – بۇگىنگى ۇرپاقتىڭ ەرتەڭگى كۇنگە دەگەن سەنىمى، ەلدىڭ بولاشاعىنا امانات ەتكەن جۇرەك ءسوزى دەپ بىلەمىن، - دەيدى ول.
وسىلايشا، اتالمىش اللەيا تالدىقورعان قالاسىنىڭ حالىق دەمالاتىن كورنەكتى ورىندارىنىڭ بىرىنە اينالماق.
قاتىسۋشىلار شارا سوڭىندا ەستەلىك سۋرەتكە ءتۇسىپ، اقساقالدار شارانى ۇيىمداستىرۋشىلار مەن جاستارعا اقجولتاي تىلەكتەرىن ءبىلدىردى.
