Oblys basshysy A. Batalov aldymen oblystyq kópsalaly balalar aýrýhanasynyń janynan salynǵan qosalqy ǵimarattyń qurylysymen tanysty. Ótken jyldyń mamyr aiynda bastalǵan ǵimarattyń qurylysy búginde tolyǵymen aiaqtalǵan. Qazir munda eń ozyq úlgidegi meditsinalyq qural-jabdyqtar ornatylýda. Bul ǵimarat balalar neonataldyq hirýrgiia bólimi retinde qyzmet kórsetpek. Mamandardyń aitýynsha, bul jańa bólim náreste ólimin azaitýǵa, túrli aqaýlarmen dúniege kelgen sábilerge ota jasaý arqyly ómirin saqtap qalýǵa múmkindik beredi.
Ǵimarattaǵy palatalardy, jan saqtaý, tańý jáne basqa da bólmelerdi aralap kórgen oblys ákimi Amandyq Batalov olarda ornatylyp jatqan meditsinalyq qural-jabdyqtardyń, jihazdardyń sapasyna nazar aýdaryp, kereýetterdi aýystyrýdy tapsyrdy.
Munan soń ortalyq alańdaǵy fontandardy jóndeý men jańa fontandar ornatý isimen, onyń irgeles alańyndaǵy jumystarmen tanysty. Jetisýdyń jeti ózenin beineleitin jeti sýburqaqtyń qurylys jumystarymen «Asat Qurylys» mekemesi ainalysýda.
Sonymen qatar alańnyń ainalasy abattandyrylyp, munda ósimdiktiń 200-ge jýyq túri otyrǵyzylatyn bolady. Bul kórkeitý jumysyna «Polesie» JShS kirisip jatyr. Seriktestik direktory Elena Chernetskaia oblys basshysyna kógaldandyrý boiynsha atqarylatyn jumysty baiandap berdi.
Táýelsizdik kóshesi, 124 úidiń abattandyrylǵan aýlasyna barǵan oblys ákimi A.Batalov mundaǵy kóptegen kemshilikterdi kórsetip berdi. Aýla qorshaýynyń qońyrmen, fýtbol alańy qorshaýynyń kókpen boialýy kózge birden oǵash kórinedi. Al ornatylǵan oryndyq pen qoqys jáshikteriniń sapasy da kóńil kónshitpeidi. Fýtbol alańynyń ishki tósemelerine qatysty da oblys ákimi tarapynan syn aityldy. Jasalǵan eskertpeler negizinde merdiger kompaniia jumysty qaita jasaityn bolady.
Almaty oblysy ákiminiń baspasóz qyzmeti
