Oblys basshysy A. Batalov aldymen oblystyq kópsalaly balalar aýrýhanasynyń janynan salynǵan qosalqy ǵımarattyń qurylysymen tanysty. Ótken jyldyń mamyr aıynda bastalǵan ǵımarattyń qurylysy búginde tolyǵymen aıaqtalǵan. Qazir munda eń ozyq úlgidegi medısınalyq qural-jabdyqtar ornatylýda. Bul ǵımarat balalar neonataldyq hırýrgıa bólimi retinde qyzmet kórsetpek. Mamandardyń aıtýynsha, bul jańa bólim náreste ólimin azaıtýǵa, túrli aqaýlarmen dúnıege kelgen sábılerge ota jasaý arqyly ómirin saqtap qalýǵa múmkindik beredi.
Aýrýhana janynan salynǵan qosalqy ǵımarat qurylysynyń quny – 896,2 mln. teńge. Qurylys jumystaryn «Almaty-Construction BM» júrgizgen.
Ǵımarattaǵy palatalardy, jan saqtaý, tańý jáne basqa da bólmelerdi aralap kórgen oblys ákimi Amandyq Batalov olarda ornatylyp jatqan medısınalyq qural-jabdyqtardyń, jıhazdardyń sapasyna nazar aýdaryp, kereýetterdi aýystyrýdy tapsyrdy.
Sol sıaqty aýrýhananyń jylytý maýsymyna daıyndyǵyn taǵy bir márte pysyqtaý kerektigin eskertti. Aýlasyn tolyq abattandyrýymen qosa qazirgi qoldanystaǵy balalar aýrýhanasyn jóndeýdi kelesi jyldyń josparyna engizý tapsyryldy.
Munan soń ortalyq alańdaǵy fontandardy jóndeý men jańa fontandar ornatý isimen, onyń irgeles alańyndaǵy jumystarmen tanysty. Jetisýdyń jeti ózenin beıneleıtin jeti sýburqaqtyń qurylys jumystarymen «Asat Qurylys» mekemesi aınalysýda.
Sonymen qatar alańnyń aınalasy abattandyrylyp, munda ósimdiktiń 200-ge jýyq túri otyrǵyzylatyn bolady. Bul kórkeıtý jumysyna «Polesie» JSHS kirisip jatyr. Seriktestik dırektory Elena Cherneskaıa oblys basshysyna kógaldandyrý boıynsha atqarylatyn jumysty baıandap berdi.
Onyń aıtýynsha, munda jemisti-dekoratıvti aǵashtardyń, butalardyń, gúlderdiń, kógaldyń tústerin jáne formalaryn úılestirýge basa nazar aýdarylady. Munda landshaftyq dızaıny shyǵys stılindegi taqyryptyq baq ornatylmaq. Oblys ákimi Amandyq Batalov sýburqaq edeniniń tósemelerine, alańdy kógaldandyrý dızaınyna, jaıaý júrginshiler jolyn tóseý baǵyttaryna qatysty birqatar eskertpeler aıtyp, josparǵa ózgerister engizdi.
Táýelsizdik kóshesi, 124 úıdiń abattandyrylǵan aýlasyna barǵan oblys ákimi A.Batalov mundaǵy kóptegen kemshilikterdi kórsetip berdi. Aýla qorshaýynyń qońyrmen, fýtbol alańy qorshaýynyń kókpen boıalýy kózge birden oǵash kórinedi. Al ornatylǵan oryndyq pen qoqys jáshikteriniń sapasy da kóńil kónshitpeıdi. Fýtbol alańynyń ishki tósemelerine qatysty da oblys ákimi tarapynan syn aıtyldy. Jasalǵan eskertpeler negizinde merdiger kompanıa jumysty qaıta jasaıtyn bolady.
Almaty oblysy ákiminiń baspasóz qyzmeti
