Jergilikti óner maitalmandary eki topqa bólinip, Taldyqorǵan qalasyndaǵy bilim oshaqtaryna bas suǵyp, amandyq surasty.
Teatr ártisteri oblys ortalyǵyndaǵy №28 IT mektep-litseiiniń, №1 Abai, M. Lomonosov, D. Raqyshev atyndaǵy bilim oshaqtaryna baryp, ustazdary men oqýshylarymen kóristi.
Jetisý kógin 20-ǵa jýyq óner adamy áýezdi ánmen áýeletip, «Kórisý kúni» meiramynyń erekshelikterin dástúrge sai kórsetip baqty. Óz kezeginde oqýshylar, qos ishekten kúmbirletip kúi tógip, án salyp, «Qara jorǵa» biin biledi. Al, teatr serkeleri talaby taýdai balalarǵa tátti-dámdini tartý etti.
Adamzattyń dúnie-tanymyn qalyptastyrýdaǵy negizgi institýt – mektep. Sondyqtan da, teatr ujymy Amal merekesin dál osy mekemeden bastap, aiaǵyn aýqymdy sharaǵa ulastyrdy.
– Kórisý-halyq qystan aman-esen shyǵyp, kóktemniń shýaqty kúni bir-birimen qýana qaýyshqan, izgi niet-tilegin jaýdyrǵan qazaqtyń ejelgi meiramy. Bul merekeniń basty maqsaty qazirgi óskeleń urpaqqa salt-dástúrimizdi, tilimizdi, dinimizdi, balalarǵa miras etip qaldyrý. Sharaǵa mektep jasyndaǵy oqýshylar, jastar qaýymy jinaldy. Joǵary býyn ókilderi ejelden saqtalǵan dástúrdi kópke keńinen tanystyrdy, – deidi B. Rimova atyndaǵy drama teatrynyń direktory Rýslan Isabekuly.
Aita keteiik, B. Rimova atyndaǵy drama teatr ártisteri I. Jansúgirov atyndaǵy mádeniet saraiynda «Betashar», «Tusaý kesý», «Mai jaǵý» syndy qazaqtyń ata-dástúrinen sahnalandyrylǵan kórinis qoidy. Sondai-aq, balalar úiiniń tárbielenýshileri úshin aq dastarhan jaiylyp, qonaqtar nazaryna úlken merekelik kontsert usynyldy.
