جەرگىلىكتى ونەر مايتالماندارى ەكى توپقا ءبولىنىپ، تالدىقورعان قالاسىنداعى ءبىلىم وشاقتارىنا باس سۇعىپ، اماندىق سۇراستى.
تەاتر ارتىستەرى وبلىس ورتالىعىنداعى №28 IT مەكتەپ-ليسەيىنىڭ، №1 اباي، م. لومونوسوۆ، د. راقىشيەۆ اتىنداعى ءبىلىم وشاقتارىنا بارىپ، ۇستازدارى مەن وقۋشىلارىمەن كورىستى.
جەتىسۋ كوگىن 20-عا جۋىق ونەر ادامى اۋەزدى انمەن اۋەلەتىپ، «كورىسۋ كۇنى» مەيرامىنىڭ ەرەكشەلىكتەرىن داستۇرگە ساي كورسەتىپ باقتى. ءوز كەزەگىندە وقۋشىلار، قوس ىشەكتەن كۇمبىرلەتىپ كۇي توگىپ، ءان سالىپ، «قارا جورعا» ءبيىن بيلەدى. ال، تەاتر سەركەلەرى تالابى تاۋداي بالالارعا ءتاتتى-دامدىنى تارتۋ ەتتى.
ادامزاتتىڭ دۇنيە-تانىمىن قالىپتاستىرۋداعى نەگىزگى ينستيتۋت – مەكتەپ. سوندىقتان دا، تەاتر ۇجىمى امال مەرەكەسىن ءدال وسى مەكەمەدەن باستاپ، اياعىن اۋقىمدى شاراعا ۇلاستىردى.
– كورىسۋ-حالىق قىستان امان-ەسەن شىعىپ، كوكتەمنىڭ شۋاقتى كۇنى بىر-بىرىمەن قۋانا قاۋىشقان، ىزگى نيەت-تىلەگىن جاۋدىرعان قازاقتىڭ ەجەلگى مەيرامى. بۇل مەرەكەنىڭ باستى ماقساتى قازىرگى وسكەلەڭ ۇرپاققا ءسالت-داستۇرىمىزدى، ءتىلىمىزدى، ءدىنىمىزدى، بالالارعا ميراس ەتىپ قالدىرۋ. شاراعا مەكتەپ جاسىنداعى وقۋشىلار، جاستار قاۋىمى جينالدى. جوعارى بۋىن وكىلدەرى ەجەلدەن ساقتالعان ءداستۇردى كوپكە كەڭىنەن تانىستىردى، – دەيدى ب. ريموۆا اتىنداعى دراما تەاترىنىڭ ديرەكتورى رۋسلان يسابەك ۇلى.
ايتا كەتەيىك، ب. ريموۆا اتىنداعى دراما تەاتر ارتىستەرى ءى. جانسۇگىروۆ اتىنداعى مادەنيەت سارايىندا «بەتاشار»، «تۇساۋ كەسۋ»، «ماي جاعۋ» سىندى قازاقتىڭ اتا-داستۇرىنەن ساحنالاندىرىلعان كورىنىس قويدى. سونداي-اق، بالالار ءۇيىنىڭ تاربيەلەنۋشىلەرى ءۇشىن اق داستارحان جايىلىپ، قوناقتار نازارىنا ۇلكەن مەرەكەلىك كونسەرت ۇسىنىلدى.
