Biyl Iliias Jansúgirov atyndaǵy Jetisý ýniversitetiniń túlekteri úshin diplom tabystaý rásimi erekshe ári áserli formatta uiymdastyryldy. Eki kún qatarynan Biken Rimova atyndaǵy Taldyqorǵan drama teatrynyń keń zaly qýanysh pen shattyqqa toly boldy. Saltanatty sharaǵa kelgen ata-analar, týǵan-týystar men dostar túlekterdiń qýanyshyn bólisti,- dep habarlaidy Dalanews.kz
Ýniversitetti biyl 1044 túlek aiaqtap, úlken ómirge joldama aldy. Olardyń qatarynda 113-i úzdik diplom iegeri atansa, 360 bilim alýshy magistr akademiialyq dárejesin ielendi.
Merekelik sharaǵa Memlekettik qyzmet isteri agenttiginiń Jetisý oblysy boiynsha departamentiniń basshysy Manap Qobylan, Jetisý oblystyq máslihatynyń tóraǵasy Gúlnar Toilybaeva, Taldyqorǵan qalasy ákiminiń orynbasary Jeńis Andabekov, Jetisý oblysynyń Ádep jónindegi ýákili Ǵabit Tursynbai, oblystyq TJD bastyǵy Nurlan Bekbosynov, Qazaqstannyń qurmetti jýrnalisi Ámire Árin, Qoǵamdyq damý basqarmasynyń basshysy Baýyrjan Abibeko, sondai-aq aýdan ákimderi men oblystyq jáne qalalyq bilim bólimderiniń basshylary qatysyp, túlekterge sát-sapar tiledi.
Saltanatty rásim barysynda oblystyq ardagerler keńesiniń tóraǵasy Ermek Kelemseiit jas túlekterge aq batasyn berdi.
"Bilimdi maman – el bolashaǵynyń tiregi, qoǵam damýynyń qozǵaýshy kúshi. Sondyqtan búgingi jastarǵa artylar úmit pen senim mol. Qai salada eńbek etseńizder de, kásibi biliktilikpen qatar jaýapkershilik pen adaldyq siiaqty asyl qasietterden alystamańyzdar. Aldaǵy ómir joldaryńyz jarqyn bolsyn!
Qurmetti ata-analar men oqytýshylar, búgingi qýanysh – sizderdiń de eńbekterińizdiń jemisi. Ózderińizge alǵys bildire otyryp, zor densaýlyq pen tabys tileimin", – dep túlekterge izgi tilegin jetkizdi Ýniversitettiń Basqarma tóraǵasy – rektor Ermek Bóribaev.
Saltanatty rásim barysynda ýniversitettiń qoǵamdyq ómirine belsene aralasqan túlekter de nazardan tys qalmady. Olar «Belsendi qoǵamdyq qyzmeti úshin» medalimen jáne Alǵys hattarmen marapattaldy.
