بيىل ءىلياس جانسۇگىروۆ اتىنداعى جەتىسۋ ۋنيۆەرسيتەتىنىڭ تۇلەكتەرى ءۇشىن ديپلوم تابىستاۋ ءراسىمى ەرەكشە ءارى اسەرلى فورماتتا ۇيىمداستىرىلدى. ەكى كۇن قاتارىنان بيكەن ريموۆا اتىنداعى تالدىقورعان دراما تەاترىنىڭ كەڭ زالى قۋانىش پەن شاتتىققا تولى بولدى. سالتاناتتى شاراعا كەلگەن اتا-انالار، تۋعان-تۋىستار مەن دوستار تۇلەكتەردىڭ قۋانىشىن ءبولىستى،- دەپ حابارلايدى Dalanews.kz
ۋنيۆەرسيتەتتى بيىل 1044 تۇلەك اياقتاپ، ۇلكەن ومىرگە جولداما الدى. ولاردىڭ قاتارىندا 113ء-ى ۇزدىك ديپلوم يەگەرى اتانسا، 360 ءبىلىم الۋشى ماگيستر اكادەميالىق دارەجەسىن يەلەندى.
مەرەكەلىك شاراعا مەملەكەتتىك قىزمەت ىستەرى اگەنتتىگىنىڭ جەتىسۋ وبلىسى بويىنشا دەپارتامەنتىنىڭ باسشىسى ماناپ قوبىلان، جەتىسۋ وبلىستىق ءماسليحاتىنىڭ ءتوراعاسى گۇلنار تويلىبايەۆا، تالدىقورعان قالاسى اكىمىنىڭ ورىنباسارى جەڭىس اندابەكوۆ، جەتىسۋ وبلىسىنىڭ ادەپ جونىندەگى ۋاكىلى عابيت تۇرسىنباي، وبلىستىق تجد باستىعى نۇرلان بەكبوسىنوۆ، قازاقستاننىڭ قۇرمەتتى ءجۋرناليسى امىرە ءارىن، قوعامدىق دامۋ باسقارماسىنىڭ باسشىسى باۋىرجان ابيبەكو، سونداي-اق اۋدان اكىمدەرى مەن وبلىستىق جانە قالالىق ءبىلىم بولىمدەرىنىڭ باسشىلارى قاتىسىپ، تۇلەكتەرگە ءسات-ساپار تىلەدى.
سالتاناتتى ءراسىم بارىسىندا وبلىستىق ارداگەرلەر كەڭەسىنىڭ ءتوراعاسى ەرمەك كەلەمسەيىت جاس تۇلەكتەرگە اق باتاسىن بەردى.
"ءبىلىمدى مامان – ەل بولاشاعىنىڭ تىرەگى، قوعام دامۋىنىڭ قوزعاۋشى كۇشى. سوندىقتان بۇگىنگى جاستارعا ارتىلار ءۇمىت پەن سەنىم مول. قاي سالادا ەڭبەك ەتسەڭىزدەر دە، كاسىبي بىلىكتىلىكپەن قاتار جاۋاپكەرشىلىك پەن ادالدىق سياقتى اسىل قاسيەتتەردەن الىستاماڭىزدار. الداعى ءومىر جولدارىڭىز جارقىن بولسىن!
قۇرمەتتى اتا-انالار مەن وقىتۋشىلار، بۇگىنگى قۋانىش – سىزدەردىڭ دە ەڭبەكتەرىڭىزدىڭ جەمىسى. وزدەرىڭىزگە العىس بىلدىرە وتىرىپ، زور دەنساۋلىق پەن تابىس تىلەيمىن"، – دەپ تۇلەكتەرگە ىزگى تىلەگىن جەتكىزدى ۋنيۆەرسيتەتتىڭ باسقارما ءتوراعاسى – رەكتور ەرمەك بورىبايەۆ.
سالتاناتتى ءراسىم بارىسىندا ۋنيۆەرسيتەتتىڭ قوعامدىق ومىرىنە بەلسەنە ارالاسقان تۇلەكتەر دە نازاردان تىس قالمادى. ولار «بەلسەندى قوعامدىق قىزمەتى ءۇشىن» مەدالىمەن جانە العىس حاتتارمەن ماراپاتتالدى.
