«İ. Jansúgirov atyndaǵy Jetisý ýnıversıteti» KeAQ Basqarma Tóraǵasy - rektor Ermek Bóribaev 2025 jyldyń qorytyndysy boıynsha oblys turǵyndary aldynda esep berdi. Eseptik kezdesýge oblystyq, qalalyq máslıhat depýtattary, qala turǵyndary jáne Jetisý ýnıversıtetiniń ujymy qatysty, dep habarlaıdy Dalanews.kz.
İ.Jansúgirov atyndaǵy Jetisý ýnıversıteti 2024–2025 oqý jylynda bilim berý, ǵylym jáne halyqaralyq yntymaqtastyq baǵyttarynda turaqty damýyn kórsetti. Ýnıversıtette 800-den astam profesor-oqytýshy eńbek etedi, olardyń 51 paıyzy ǵylymı dárejege ıe. Ǵylym doktorlary, PhD, ǵylym kandıdattarynyń úlesi jyl saıyn artyp keledi.
Bilim berý qyzmeti aıasynda 117 bilim berý baǵdarlamasy júzege asyrylyp, jasandy ıntellekt, taý jáne alpilik ekologıa, ekonomıka jáne basqarý syndy jańa baǵyttar ashyldy. Stýdentter sany 2024 jyly 5809-dy, 2025 jyly 6401-di qurady. Túlekterdiń jumysqa ornalasýy 89 paıyzdy kórsetti.
Ýnıversıtet ulttyq jáne halyqaralyq reıtıńterde aıtarlyqtaı nátıjege qol jetkizdi. Bilim sapasyn qamtamasyzdandyrý boıynsha táýelsiz agenttigi IQAA Ranking (NAOKO) júrgizgen 2025 jylǵy ınstıýsıonaldyq reıtıń nátıjeleri boıynsha JÝ kópsalaly JOO arasynda úzdik 3-ke endi. «Atameken» UKP reıtıńi boıynsha 10 bilim berý baǵdarlamasy úzdik ondyqqa ense, UI GreenMetric, QS Asia, Times Higher Education reıtıńterinde pozısıasy jaqsardy.
JÝ 85-ten astam sheteldik ýnıversıtettermen yntymaqtastyq ornatqan. Seriktes JOO ishinde 15 ýnıversıtet halyqaralyq reıtıńterde TOP 1000-ǵa kiredi.
Bilim ordasynyń oqytýshy-ǵalymdary granttyq jáne baǵdarlamaly nysanaly qarjylandyrý aıasynda birneshe baǵyt boıynsha 3.5 mıllıardtan astam teńgeniń ǵylymı jobasy men baǵdarlamasyn oryndap jatyr. Ǵylymı salada «Jas Galym» jobalary, granttyq qarjylandyrý kóleminiń ósýi, patentter men avtorlyq kýálikterdiń alynýy ýnıversıtettiń ǵylymı áleýetin arttyrdy. Zamanaýı zerthanalar, halyqaralyq kampýstar men akademıalyq utqyrlyq baǵdarlamalary ýnıversıtettiń básekege qabilettiligin nyǵaıta tústi.
Ýnıversıtette qos dıplomdy bilim berý baǵdarlamalary júzege asyrylyp keledi. Bul baǵdarlamalar aıasynda stýdentter Altaı memlekettik, Pshasnysh Lıngvısıka-tehnıkalyq, Pomorsk jáne Jılına ýnıversıtetterinde magıstratýra boıynsha, al Marke ýnıversıtetinde bakalavrıat boıynsha bilim alady.
Memleket basshysy Qasym-Jomart Toqaevtyń tapsyrmasyna sáıkes elimizde sheteldik jetekshi ýnıversıtetterdiń fılıaldary ashylyp, osy baǵytta Ǵylym jáne joǵary bilim mınıstrligi júıeli jumys atqardy. Sonyń nátıjesinde Jetisý ýnıversıtetiniń janynan Italıanyń Marke polıtehnıkalyq ýnıversıtetiniń fılıaly ashyldy.
Qazirgi ýaqytta fılıalda 27 stýdent bilim alyp jatyr. Baǵdarlamany tabysty aıaqtaǵan túlekterge Italıanyń Aýyl sharýashylyǵy ǵylymdary men tehnologıalary salasyndaǵy bakalavr dıplomy jáne Qazaqstannyń Aýyl sharýashylyǵy bakalavry dıplomy beriledi.
İ.Jansúgirov atyndaǵy Jetisý ýnıversıteti sońǵy jyldary bilim men ǵylymdy damytýmen qatar, jastar saıasaty men áleýmettik qoldaý, ınfraqurylymdy jańǵyrtý baǵyttarynda keshendi jumystar atqarýda.
Jastardyń azamattyq belsendiligin arttyrý – ýnıversıtettiń basty basymdyqtarynyń biri. 2023–2025 jyldary jastar uıymdary, volonterlik qozǵalystar, sporttyq jáne zıatkerlik is-sharalar sany edáýir ósti. Ýnıversıtet jastary oblystyq, respýblıkalyq jáne halyqaralyq deńgeıde chempıon atandy.
Infraqurylymdy damytý baǵytynda oqý korpýstarynda kúrdeli jóndeý jumystary júrgizilip, demeýshilerdiń qoldaýymen jańa nysandar salyndy. Atap aıtqanda, KAINAR-AKB akýmýlátor zaýytynyń demeýshiligimen №3 oqý korpýsyndaǵy akt zaly jańǵyrtylýda, al oblys ákimdiginiń qoldaýymen №2 oqý korpýsy aýmaǵy abattandyryldy.
2026 jylǵa arnalǵan damý josparynda ǵylymı zertteýlerdi keńeıtý, ınklúzıvti orta qalyptastyrý, jasandy ıntellekt pen sıfrlyq tehnologıalardy engizý, halyqaralyq áriptestikti nyǵaıtý jáne stýdenttik ómir sapasyn arttyrý kózdelgen. Josparlanǵan baǵyttar boıynsha júrgizilgen jumystar ýnıversıtettiń bilim berý, ǵylymı-zertteý jáne áleýmettik ınfraqurylym salasynda turaqty damýǵa qol jetkizgenin kórsetti.
