Ýkraina tarapynan Reseidegi iri munai óńdeý kásiporyndarynyń biri – Omby munai óńdeý zaýytyna jasalǵan shabýyl Qazaqstannyń janar-jaǵarmai naryǵyna áser ete me degen saýal qoǵamda qyzý talqylanyp jatyr, dep habarlaidy dalanews.kz.
Áleýmettik jelilerde Reseide janarmai tapshylyǵy kúsheise, Qazaqstanda óndirilgen benzinge suranys artyp, ishki naryqta tapshylyq týyndaýy múmkin degen pikirler aitylýda.
Alaida Energetika vitse-ministri Qaiyrhan Tutqyshbaevtyń aitýynsha, kórshi eldegi jaǵdai Qazaqstannyń ishki naryǵyna keri áser etpeidi.
Onyń sózinshe, elimizde munai óńdeý qýatyn kezeń-kezeńimen ulǵaitý jumystary júrgizilip jatyr. Úsh munai óńdeý zaýytyn jańǵyrtý jáne olardyń óndiristik qýatyn arttyrý arqyly 2032 jylǵa qarai ishki naryqtaǵy janarmai tapshylyǵyn tolyq joiý josparlanǵan. Sonymen qatar jyldyq qýaty 10 mln tonna bolatyn tórtinshi munai óńdeý zaýytyn salý máselesi de qarastyrylyp jatyr.
Vitse-ministrdiń málimetinshe, júzege asyrylyp jatqan jobalar nátijesinde avtokólik benzinin óndirý kólemi jylyna 5,6 mln tonnadan 9 mln tonnaǵa, dizel otyny 6,2 mln tonnadan 9,5 mln tonnaǵa, al aviaotyn óndirisi 0,7 mln tonnadan 1,7 mln tonnaǵa deiin ulǵaiady. 2033 jylǵa qarai Qazaqstannyń jalpy munai óńdeý qýaty jylyna 40 mln tonnaǵa jetedi.
Energetika ministrligi keńeitý jobalary aiaqtalǵannan keiin Qazaqstan ishki suranysty tolyq qamtamasyz etip qana qoimai, benzin men dizel otynyn eksporttaý múmkindigine de ie bolatynyn atap ótti.
