«ءى. جانسۇگىروۆ اتىنداعى جەتىسۋ ۋنيۆەرسيتەتى» كەاق باسقارما ءتوراعاسى - رەكتور ەرمەك بورىبايەۆ 2025 جىلدىڭ قورىتىندىسى بويىنشا وبلىس تۇرعىندارى الدىندا ەسەپ بەردى. ەسەپتىك كەزدەسۋگە وبلىستىق، قالالىق ءماسليحات دەپۋتاتتارى، قالا تۇرعىندارى جانە جەتىسۋ ۋنيۆەرسيتەتىنىڭ ۇجىمى قاتىستى، دەپ حابارلايدى Dalanews.kz.
ءى.جانسۇگىروۆ اتىنداعى جەتىسۋ ۋنيۆەرسيتەتى 2024–2025 وقۋ جىلىندا ءبىلىم بەرۋ، عىلىم جانە حالىقارالىق ىنتىماقتاستىق باعىتتارىندا تۇراقتى دامۋىن كورسەتتى. ۋنيۆەرسيتەتتە 800-دەن استام پروفەسسور-وقىتۋشى ەڭبەك ەتەدى، ولاردىڭ 51 پايىزى عىلىمي دارەجەگە يە. عىلىم دوكتورلارى، PhD، عىلىم كانديداتتارىنىڭ ۇلەسى جىل سايىن ارتىپ كەلەدى.
ءبىلىم بەرۋ قىزمەتى اياسىندا 117 ءبىلىم بەرۋ باعدارلاماسى جۇزەگە اسىرىلىپ، جاساندى ينتەللەكت، تاۋ جانە الپىلىك ەكولوگيا، ەكونوميكا جانە باسقارۋ سىندى جاڭا باعىتتار اشىلدى. ستۋدەنتتەر سانى 2024 جىلى 5809-دى، 2025 جىلى 6401ء-دى قۇرادى. تۇلەكتەردىڭ جۇمىسقا ورنالاسۋى 89 پايىزدى كورسەتتى.
ۋنيۆەرسيتەت ۇلتتىق جانە حالىقارالىق رەيتينگتەردە ايتارلىقتاي ناتيجەگە قول جەتكىزدى. ءبىلىم ساپاسىن قامتاماسىزداندىرۋ بويىنشا تاۋەلسىز اگەنتتىگى IQAA Ranking (ناوكو) جۇرگىزگەن 2025 جىلعى ينستيۋسيونالدىق رەيتينگ ناتيجەلەرى بويىنشا جۋ كوپسالالى جوو اراسىندا ۇزدىك 3-كە ەندى. «اتامەكەن» ۇكپ رەيتينگى بويىنشا 10 ءبىلىم بەرۋ باعدارلاماسى ۇزدىك وندىققا ەنسە، UI GreenMetric، QS Asia، Times Higher Education رەيتينگتەرىندە پوزيسياسى جاقساردى.
جۋ 85-تەن استام شەتەلدىك ۋنيۆەرسيتەتتەرمەن ىنتىماقتاستىق ورناتقان. سەرىكتەس جوو ىشىندە 15 ۋنيۆەرسيتەت حالىقارالىق رەيتينگتەردە توپ 1000-عا كىرەدى.
ءبىلىم ورداسىنىڭ وقىتۋشى-عالىمدارى گرانتتىق جانە باعدارلامالى نىسانالى قارجىلاندىرۋ اياسىندا بىرنەشە باعىت بويىنشا 3.5 ميللياردتان استام تەڭگەنىڭ عىلىمي جوباسى مەن باعدارلاماسىن ورىنداپ جاتىر. عىلىمي سالادا «Jas Galym» جوبالارى، گرانتتىق قارجىلاندىرۋ كولەمىنىڭ ءوسۋى، پاتەنتتەر مەن اۆتورلىق كۋالىكتەردىڭ الىنۋى ۋنيۆەرسيتەتتىڭ عىلىمي الەۋەتىن ارتتىردى. زاماناۋي زەرتحانالار، حالىقارالىق كامپۋستار مەن اكادەميالىق ۇتقىرلىق باعدارلامالارى ۋنيۆەرسيتەتتىڭ باسەكەگە قابىلەتتىلىگىن نىعايتا ءتۇستى.
ۋنيۆەرسيتەتتە قوس ديپلومدى ءبىلىم بەرۋ باعدارلامالارى جۇزەگە اسىرىلىپ كەلەدى. بۇل باعدارلامالار اياسىندا ستۋدەنتتەر التاي مەملەكەتتىك، پشاسنىش لينگۆيستيكا-تەحنيكالىق، پومورسك جانە جيلينا ۋنيۆەرسيتەتتەرىندە ماگيستراتۋرا بويىنشا، ال ماركە ۋنيۆەرسيتەتىندە باكالاۆريات بويىنشا ءبىلىم الادى.
مەملەكەت باسشىسى قاسىم-جومارت توقايەۆتىڭ تاپسىرماسىنا سايكەس ەلىمىزدە شەتەلدىك جەتەكشى ۋنيۆەرسيتەتتەردىڭ فيليالدارى اشىلىپ، وسى باعىتتا عىلىم جانە جوعارى ءبىلىم مينيسترلىگى جۇيەلى جۇمىس اتقاردى. سونىڭ ناتيجەسىندە جەتىسۋ ۋنيۆەرسيتەتىنىڭ جانىنان يتاليانىڭ ماركە پوليتەحنيكالىق ۋنيۆەرسيتەتىنىڭ فيليالى اشىلدى.
قازىرگى ۋاقىتتا فيليالدا 27 ستۋدەنت ءبىلىم الىپ جاتىر. باعدارلامانى تابىستى اياقتاعان تۇلەكتەرگە يتاليانىڭ اۋىل شارۋاشىلىعى عىلىمدارى مەن تەحنولوگيالارى سالاسىنداعى باكالاۆر ديپلومى جانە قازاقستاننىڭ اۋىل شارۋاشىلىعى باكالاۆرى ديپلومى بەرىلەدى.
ءى.جانسۇگىروۆ اتىنداعى جەتىسۋ ۋنيۆەرسيتەتى سوڭعى جىلدارى ءبىلىم مەن عىلىمدى دامىتۋمەن قاتار، جاستار ساياساتى مەن الەۋمەتتىك قولداۋ، ينفراقۇرىلىمدى جاڭعىرتۋ باعىتتارىندا كەشەندى جۇمىستار اتقارۋدا.
جاستاردىڭ ازاماتتىق بەلسەندىلىگىن ارتتىرۋ – ۋنيۆەرسيتەتتىڭ باستى باسىمدىقتارىنىڭ ءبىرى. 2023–2025 جىلدارى جاستار ۇيىمدارى، ۆولونتەرلىك قوزعالىستار، سپورتتىق جانە زياتكەرلىك ءىس-شارالار سانى ەداۋىر ءوستى. ۋنيۆەرسيتەت جاستارى وبلىستىق، رەسپۋبليكالىق جانە حالىقارالىق دەڭگەيدە چەمپيون اتاندى.
ينفراقۇرىلىمدى دامىتۋ باعىتىندا وقۋ كورپۋستارىندا كۇردەلى جوندەۋ جۇمىستارى جۇرگىزىلىپ، دەمەۋشىلەردىڭ قولداۋىمەن جاڭا نىساندار سالىندى. اتاپ ايتقاندا، KAINAR-AKB اككۋمۋلياتور زاۋىتىنىڭ دەمەۋشىلىگىمەن №3 وقۋ كورپۋسىنداعى اكت زالى جاڭعىرتىلۋدا، ال وبلىس اكىمدىگىنىڭ قولداۋىمەن №2 وقۋ كورپۋسى اۋماعى اباتتاندىرىلدى.
2026 جىلعا ارنالعان دامۋ جوسپارىندا عىلىمي زەرتتەۋلەردى كەڭەيتۋ، ينكليۋزيۆتى ورتا قالىپتاستىرۋ، جاساندى ينتەللەكت پەن سيفرلىق تەحنولوگيالاردى ەنگىزۋ، حالىقارالىق ارىپتەستىكتى نىعايتۋ جانە ستۋدەنتتىك ءومىر ساپاسىن ارتتىرۋ كوزدەلگەن. جوسپارلانعان باعىتتار بويىنشا جۇرگىزىلگەن جۇمىستار ۋنيۆەرسيتەتتىڭ ءبىلىم بەرۋ، عىلىمي-زەرتتەۋ جانە الەۋمەتتىك ينفراقۇرىلىم سالاسىندا تۇراقتى دامۋعا قول جەتكىزگەنىن كورسەتتى.
