«QazMunaiGaz» ulttyq kompaniiasy 2030 jylǵa qarai taýarlyq gaz óndirisin jylyna 2,4 mlrd tekshe metrden 4,5 mlrd tekshe metrge deiin ulǵaitýdy josparlap otyr, dep habarlaidy dalanews.kz.
Bul týraly Úkimet otyrysynda «QazMunaiGaz» UK» AQ basqarma tóraǵasy Ashat Hasenov málimdedi.
Onyń aitýynsha, Memleket basshysynyń jańa gaz ken oryndaryn igerý jáne gaz óńdeý qýattaryn arttyrý jónindegi tapsyrmalaryn oryndaý maqsatynda birqatar iri investitsiialyq jobalar júzege asyrylyp jatyr.
«2030 jylǵa deiin taýarlyq gaz óndirý kólemi jylyna 2,4 mlrd tekshe metrden 4,5 mlrd tekshe metrge deiin ósedi. Al suiytylǵan munai gazyn óndirý kólemi 1,3 mln tonnadan 1,5 mln tonnaǵa deiin artady», – dedi Ashat Hasenov.
Onyń málimetinshe, bul kórsetkishterge Rojkovskoe, Batys Prorva jáne Ortalyq Óriktaý ken oryndaryn kezeń-kezeńimen iske qosý arqyly qol jetkiziledi.
Atap aitqanda, Rojkovskoe ken ornynyń ekinshi kezeńi 2028 jyly aiaqtalyp, jylyna 700 mln tekshe metr gaz óndirýge múmkindik beredi. Batys Prorva jobasynyń ekinshi kezeńi 2027 jyly iske qosylyp, óndiris kólemi 920 mln tekshe metrge deiin ulǵaiady. Al Aqtóbe oblysyndaǵy Ortalyq Óriktaý jobasynda 2027 jyly jylyna 1 mlrd tekshe metr shiki gaz óndirý kózdelgen.
«Osy jobalardy iske asyrý jylyna qosymsha 2,1 mlrd tekshe metr taýarlyq gaz jáne 250 myń tonna suiytylǵan gaz óndirýge múmkindik beredi», – dedi ulttyq kompaniia basshysy.
Sonymen qatar Ashat Hasenov Jańaózende jyldyq qýaty 900 mln tekshe metr bolatyn jańa gaz óńdeý zaýytynyń qurylysy júrip jatqanyn aitty. Kásiporyndy 2027 jyly paidalanýǵa berý josparlanǵan. Qazir birinshi iske qosý kesheniniń qurylys-montaj jumystary aiaqtalyp, negizgi tehnologiialyq modýlderdi ornatý jalǵasýda.
Onyń aitýynsha, qoldanystaǵy Qazaq gaz óńdeý zaýyty da jumysyn jalǵastyrady. Buǵan deiin ony paidalanýdan shyǵarý josparlanǵanymen, júrgizilgen tehnikalyq aýditten keiin zaýytty ári qarai paidalaný týraly sheshim qabyldanǵan.
«Zaýyttyń jumysyn jalǵastyrý úshin qosymsha shikizat kózderi zertteldi. Nátijesinde shamamen 3 mlrd tekshe metr gaz áleýeti anyqtaldy. Onyń 2,7 mlrd tekshe metrge jýyǵy jumys istep turǵan Qazaq gaz óńdeý zaýytyn júkteýge múmkindik beredi», – dedi ol.
Úkimet otyrysynda sondai-aq jańa gaz qorlaryn izdeý jumystary týraly aityldy. QazMunaiGaz Atyraý oblysyndaǵy «Qaraton Tuzasty», Mańǵystaýdaǵy «Bolashaq», sondai-aq «Jylyoi», «Berezovskii» jáne Qyzylorda oblysyndaǵy Shý-Sarysý ýchaskelerinde geologiialyq barlaý jumystaryn júrgizip jatyr.
Budan bólek, ulttyq kompaniia ken oryndaryn basqarýda jasandy intellektke negizdelgen ABAI tsifrlyq júiesin engizýde. Qazir tsifrlyq egiz tehnologiiasy QazMunaiGaz qorynyń 87%-yn qamtityn 12 iri ken ornynda qoldanylyp jatyr.
Kompaniianyń boljamynsha, bul tehnologiialar 2030 jylǵa deiin qosymsha 2,8 mln tonna munai men 500 mln tekshe metr ilespe gaz óndirýge múmkindik beredi.
